2018年4月30日 星期一

武漢迎花潮@花海樂園:下

睇完喱個所謂的花海梯田,似乎有點心知不妙,難道是來早了幾星期,武漢這邊餘寒猶厲,莫非還未到花期?



不過既然都一場來到,點都要行一圈先走吧!再行上一處小山丘上睇睇,遠處可以見到有摩天輪和海盜船,下面就是原稱「花海」的所在地,不過眼見花田才剛翻土,相信要過一段時間才會開始重新種花吧!至於近處山坡的小樹相信就是新種的櫻花樹苗了,部份都有開少量櫻花。



左上圖是樂園內沿湖而建的高卡車賽道,其實園內的玩樂設施都算多(另外仲有滑索和滑草場沒有影),可惜賞花的草地就仲係光禿禿,唔知佢地有冇派員去外國取經,學習下人地到底係點樣keep住四季長期有花開呢?左下圖不是普通草地,上面綠色的其實係波斯菊,即是日本人所稱的秋櫻,不過都係只能「賞葉」,連花蕾也不見,可能要等到五六月初夏才是花季吧!另外要提一提係右圖這處位於小丘上的燒烤場,下午不見有太多人開爐燒烤,反而有條友就掰大喉嚨在唱《海闊天空》,個無敵大喇叭仲要係超爆超大聲,幾乎在園裏任何角落都聽到佢果種「技安級」歌聲,難頂之餘簡直就係噪音污染,完全破壞了遊園的清幽雅興(試問北海道D花海有冇人會開咪唱K先)。



盡量唔好畀D無謂人影響旅行心情……繼續行下行下,就見到路邊有上面喱一大叢紅葉植物,唔知係乜野品種,但基爾都即刻低炒影返張似樣少少的扮下花海,交一交貨先啦!



大陸好多喱類樂園唔知點解都好興玩喱類真人劇場show,喱度都唔例外要搞返個花木蘭馬術表演,不過來到時剛好表演完無得睇。咁基爾都講返少少資料先,都係來到先知原來武漢市北郊喱度原本係叫黃陂縣,據聞是花木蘭的故鄉云云……近年武漢好似北京咁不斷向外擴展到四五環,連黃陂也歸併入武漢市郊的直轄區。翻查網料發現目前武漢三鎮的面積,比廣州、南京、上海和深圳等一線大城市都要大(但市中心區域都係經常塞車),若與香港比更加係大接近8倍,好犀利耶!



國情資訊報道完畢,又返返去睇花先……其實基爾覺得成個園區可能實在太新了,好多賞花景點雖然不盡完善,但基本的河堤柳岸佈局設計都算係幾江南水鄉風情,部份花田都見有農夫正努力地種花,相信等多三五七年旅遊配套再發展成熟少少會更有睇頭吧!



行到湖邊盡頭終於都見到喱棵似樣少少的櫻花樹,總算沒白費了腳骨力!不過佢孤單單咁獨自企在光禿花田中央,基爾就無謂行落田去近攝了,只能用手機zoom遠鏡影下佢個櫻姿美態就算(幾乎忘了申報今次旅程因為只短短速遊三四日所以偷懶沒帶相機隨行)!



拿,咪鬧基爾辦事不力住,睇埋上圖左喱一株櫻花樹先,係咪都叫做交到貨?事實上園裏逾八成花田都係剛翻土待種新花,情況就如左下那張,間中見到一兩株盛開的櫻花樹都有成群遊人蜂湧過去影,有時靚位都唔敢霸住太耐,拿拿林影完就走人。上圖右紫紅色那棵不是櫻花,好似係紫荊樹(與香港的洋紫荊屬不同品種)。



帶住少少失望心情離開花田,趁仲未天黑要再坐車趕住入山寨,因為這晚會在山寨客棧度宿一宵。至於山寨有咩睇?為免太長篇悶親blog友就留待下回分解吧!不過可先講講山上食晚飯的選擇不多,只能幫襯客棧唯一的食堂。飯餐只是些家常小炒不詳細介紹了,不過去到才知原來湘鄂菜也是偏辣和重口味,其中有味尖椒炒豆乾也不錯,微辣得來也不算太油膩(大陸即使炒碟菜也經常係成碟油好似唔駛本咁)……基爾向來不好酒(酒量接近0.05),但這款燕京啤酒溝七喜或雪碧就正好是解辣甘露了!超爽!

2018年4月26日 星期四

武漢迎花潮@花海樂園:上

暫時又擺一擺低座金山,要加快少少速度寫埋花潮喱邊先,希望唔會因為隔得太耐才寫而忘記有趣細節吧!



剛踏出機場才不過下午兩點幾,不過天色好似有點灰濛濛,是霧霾還是因為天陰多雲呢?希望對這趟花見旅程不會有太大影響。上圖中遠處圓拱形的建築就是舊客運大樓,依家聽聞是空置的,將來唔知會否翻新再用?



新航廈喱邊就人來人往得多,可能由於花期關係都幾多外地遊客到訪。真希望旅程中的這幾天武漢不會有大雨,否則櫻花可能會被雨打落一大半,賞花的雅興難免也要打個折扣了。



發完牢騷立馬出發!幸好沿途沒塞車,車程不用一粒鐘就來到武漢市郊的這個賞花新熱點(其實機場也是在武漢北面的市郊)。聞說武漢人每逢weekend都幾喜歡一家大細來這個新景點郊遊玩一天,一來因為近,交通較方便,二來原來當地人係免費入場的呢!



未入場先被這停車場嚇一嚇,因為實在太大了(如在老家一定又會用來起居屋吧),同埋內地人真係富起來啦!中外名車齊備簡直就像個車展。另外基爾還學懂了車牌的分別,大部份的鄂A字頭一定是來自省會武漢的車,另外仲有些是豫和皖字頭,看來是遠道由河南和安徽開過來的私家車,證明武漢櫻花都幾吸引四方八面遊客到訪,是一門很大的旅遊生意!幾乎忘了說遠處那間尖頂屋其實是廁所,不過實在太遠就費事行過去了(反正在機場才剛去過不太急)。



忘了影張入場券,印象中好似係60-70蚊人仔左右吧!這天來到正好是周末,所以都幾多當地人去遊玩。園區門口就有喱幅大地圖,重點當然係佢號稱有逾1500畝咁大的花海梯田!之前在網上睇過係好似日本北海道花海果類咁宏偉,不過心理上為免大失所望,還是先理智地安慰自己打個五折也收貨了,不抱太大期望是常識吧!



最吸晴的仲有喱一排「長版勞斯萊斯」晒冷車陣,站在車旁邊戴黑超的司機叔叔猛咁招手叫基爾過去坐,雖然都幾想行近少少睇下係咪高仿老翻,但最後還是壓抑了好奇心,離遠影張相就算了!坐這些電動遊園車要另收費(門票不包),應是樂園外判畀黑超叔叔經營吧!印象中坐車遊園一圈其實也不算太掠水,好似都係三幾十塊人仔左右,不過基爾想慢慢一路行一路影下花所以無諗過要坐車喎!眼見都係長者或者有小朋友或手抱BB的家庭會選擇坐車居多。



反正口水多過茶的習慣改不了,咁就睇埋喱個大路牌先入去睇花啦!咁路牌又有咩好睇呀?自從興起了姑高translate之後,基爾就會特別留意下這類有中英文對照的路牌,因為有時都會幾有娛樂性(當睇笑話都幾開心)!「田園拖拉機」就係必去果處花海梯田所在地,譯做Pastoral tractor都正常;「親子抓魚」係臨走前有去果度睇人在魚池捉魚,譯做Parent-child catch fish感覺有趣;「兒童樂園」Children paradise和「花木蘭馬戲表演」Mulan horse war show都明白知道係乜;最後兩行「旅遊商店」Tour Shop和「婚紗攝影基地」Wedding photography base開始聞到少少姑高味了!Anyway……路牌上除了英文外仲有韓文添喎(但沒有日文),唔通都有好多韓國遊客來這裏遊園?



心急賞花立馬起行吧!咦,好似有D唔係好對路,唔係得上面喱D呀嘛……當堂背脊都涼一涼!雖則話事前已經做足心理準備會有落差,但額角不期然也冒出一大滴汗(還有幾條藍間)!

2018年4月23日 星期一

舊金山居閑話@Costco

睇完D港產blog,又回味返D金山見聞錄吧!這個星期五大清早,又迎來藍天白雲的好天氣!同甜姐兒晨運走一圈之後,再出去這附近中學的大操場行一陣,因為原來每逢禮拜尾這裏都會有個農墟,一於去趁一趁。



記得之前去過旺角花墟的農墟逛過,好似都係一年有兩三次開辦吧!不過實際上售賣真正新鮮農作物的攤檔不太多,大部份是賣乾貨或者罐頭食品之類,也有小食亭賣魚蛋果汁豆腐花之類,另外仲有刀叉杯碟廚具等攤檔,就似是個小型工展會一樣。



反而喱度個農墟就比較真正「回歸田園」多一點,也名正言順多一點,賣的大部份也是本地附近農莊出產的農產品(擺攤檔的小販也八成是拉美裔),有些還標明是organic種植。



除了上圖的大紅番茄和奇異果之外,仲有好多乾果、合桃杏仁之類的nuts,還有些基爾沒見過的生果和蔬菜,可能都是美洲特有的品種吧(見到一種類似碌柚的生果)!順帶一提這裏的奇異果也真便宜,1磅才USD$1.8係咪平過老家的P記W記超市好多?



既然出了街,無理由去一度地方就咁快返屋企吧!咁順便又去埋上圖這間在這邊都頗出名的大堆頭綜合式超市Costco。基爾屋企附近喱間分店望落就似個大倉庫,賣的東西種類又夠晒多,除一般食品之外仲有各式家居電器、廚具、衣褲鞋襪、玩具、營養補充劑和藥品,又或者手機電腦之類的電子產品,就連百葉窗簾、梳化桌椅和寵物用品都一應俱備,一句講晒勝在地方夠晒大,確實比老家的百貨公司大得多!



記得好耐好耐以前,香港也曾有過家樂福喱類大型超市,更早之前仲有吉利市Klasse Grand,還有日資的八百伴和吉之島等等,不過最後可能都因為舖租太貴無法經營下去。行Costco時也有點時光倒流回到80年代行巨無霸超市百貨店的感覺,網上search才知它原來是全美第二大的零售百貨連鎖店,第一位唔知係咪Walmart呢?



齋想當年明顯食唔得飽,都係搵地方祭一祭五臟廟較實際(這說法係咪超級old school),既然有成個貨倉咁大的超市無理由無食野地方吧!事實上基爾見好多人都係一家大細來行街,是足夠消磨一個下午的親子活動。行得累了餓了,就可以順便幫襯埋超市外面喱間露天hot dog茶座,服務係咪好一條龍呢(都話美國人最懂營銷策略)!



話明係hot dog茶座咁點都要叫隻熱狗吧!如果有食過Subway果類美式三文治店就知,排隊買來的熱狗一般只有個長麵包捲住條腸(上圖基爾這隻熱狗不是包腸而係碎咸牛肉),自己喜歡唧芥末醬還是茄汁、香草醬、蛋黃醬、沙律醬又或者千島醬就自己去隔籬部機唧,汽水也是買個紙杯自己去斟(regular已是麥記加大裝高杯而且係無限refill),基爾最鍾意去玩沖檸茶,因為佢D紅茶和檸檬糖水係分開扭水龍頭斟出來,完全可以自己控制甜度,除了檸茶之外仲可以玩溝紅莓茶和菠蘿茶之類,基爾一般都係多茶少甜,同樣係無限refill……



除了熱狗之外仲可以叫pizza添喎!就連pizza種類都有成十幾種選擇,想玩大胃王挑戰賽的話可以叫全個(目測隔籬桌果個有18-20inch),細食基爾買一角仔份量都幾大,同埋可以試多幾款啦(最後都係食唔晒要打包返屋企做晚餐)!好喇講左咁耐,咁一個熱狗餐連杯野飲幾銀呢又?雖然基爾忘了影佢個價錢牌,但印象中熱狗係超級平,無記錯好似係USD$1.5,係咪抵食到癲左!Pizza一角好似都係兩三蚊,一整個圓批就十至十二蚊左右吧(搞到以後都不想食港產果D囉)!



外地D家居廚房大,咁有焗爐都係好平常的廚房設備,平時除左可以焗cake焗pizza之外,其實仲有好多野可以玩。之前見好多外國blogmate都有焗燒雞又或者自製叉燒和燒肉之類,感覺真係好神奇,因為平時在老家九成九都係幫襯燒臘店或者茶樓買現成斬料返屋企食,不可能自家製(亦都無地方或者閒情整)。基爾喱日就有機會睇到來訪的阿姨和表姐示範整燒肉,真係好amazing喎!睇住佢地焗完又插針之後又再焗都幾盞鬼,其實都唔算太困難(先決條件當然要有個大焗爐)!而且個製成品賣相都幾似街買的燒肉,最重要係新鮮出爐層皮係超級脆又不油膩,好有成功感呢(諗起回老家後會食唔返點算)!



食飽飯之後仲有甜品時間,喱盒macaron就係晏晝行Costco時買的,擺出來係咪都幾有體面幾豪的感覺?至少勝在夠晒靚仔吧!裏面都有好多種味喎,除了有原味之外,仲有朱古力 / 綠茶 / 草莓 / 檸檬等,不過其實基爾都預計到食落係令人打冷震的經典番鬼甜度吧,如果配返杯格雷伯爵茶就可以平衡返晒!



咬住個馬卡龍嘆住杯紅茶,對眼好似比較得閒喎,咁就睇下電視啦!話時話在這邊真係無乜點睇電視,一來無乜野好睇,二來亦很少全日都留在家。好多時晚飯後幫手洗完碗之後(拿拿拿基爾係有幫手的),就是主要的TV time了。基爾比較多會睇廣東話新聞時段(有香港新聞),另外有個台會播台灣節目都幾好睇,仲有播足球美式足球籃球冰曲之類的體育節目,喱晚原來有轉播勇士對湖人的NBA賽事,講晒係加州打吡唔係唔睇呀嘛!



劇集方面,比較多睇的有陳年的《Friends》;令人意外地佢仲有個台播《那年花開月正圓》,而且係比無記播得還要快喎(仲要係播整整一粒鐘)!平時基爾長期OT,基本上係無乜機會在家裏睇到此劇,反而來到異鄉才可以安安樂樂食飽飯坐定定來煲劇,初頭以為喱類戲都離不開婆婆媽媽拖泥帶水眼淚催人之類的劇情吧!不過睇落又幾ok喎,至少係有D劇力令觀眾會追看落去。

2018年4月19日 星期四

新田購物城運吉遊@元朗

回歸老家之後,心裏其實一直有幾處新地方想去逛逛,不過一直都很忙沒餘暇時間,趁住喱個weekend咁又即刻坐言起行,用短短一個優閒下午去閃電速遊一轉!



其實之前已聽閒這個新田購物城早於新年前後開幕了,然而由於交通實在不太方便,始終沒太大意欲去看看有什麼賣點。基爾這天就相約幾個同學仔先來到上水吹水聚餐,怎知一坐落就天南地北大傾了一餐,再看看手錶已經成3點了,還不快起行恐怕就要天黑!結果火速跑去搭76K,約半個鐘就來到新田,上圖是在新田落車的巴士站,請找亮點……



千奇百趣睇真D,到底喱個巴士站有乜咁爆趣呢?有冇人發現,點解喱度要幢兩個完全一模一樣的76K巴士站牌呢?莫非係驚巴士司機叔叔睇唔清楚會唔小心飛站?Anyway……都係唔好咁八卦,先行去車站旁邊喱間東山古廟睇睇先,反正搭咁遠車一場來到,係咪睇多個景點會著數D?



喱間位於新田永平村口的東山古廟咪見佢修葺得咁新淨光鮮,翻查資料才知原來佢始建於15世紀明朝成化六年(1470年),至今已經有500幾年歷史,果然是「古廟」吧!最近一次重修於1970年,現獲列為香港三級歷史建築。基爾入內簡單走了一圈,是很典型的中式廟堂設計,常見的神像香塔祭祀設施一應俱備,很值得入去參觀。



之後再去行埋另一景點,基爾都係來到先知原來這裏仲有個文天祥公園,如果中學時有讀中國歷史應該一定知文天祥是誰吧!就是那位「宋末三傑」之一的南宋末代丞相,之前基爾都聽過文氏係新界五大姓氏之一(聞說是小學名校入學試題目云云),不過都係依家先知原來佢地係文天祥後人,至今仍定居於元朗新田一帶。



文天祥公園裏有座十幾廿尺高的巨型文天祥石像,由於公園位於小山上,向北遠望可以見到深圳鬧市一帶的高樓大廈;園內還有非常宏偉的環型浮雕石碑,記載文天祥護送宋帝一直南遷的歷史,還有之後文氏後人的族譜之類。離開公園行過另一邊仲見到上圖這間古色古香的大夫第,是清朝同治四年(1865年)文頌鑾所建的府第,他曾獲賜封大夫銜。可惜這天來到正在維修,無法入內參觀。



咁就繼續行返出去大路先。沿住喱條分岔路左轉入去東永安路,已經見到大大個新田購物城的路牌,相信應該不會太難找吧!



再向前行三兩分鐘已經見到購物城的入口了,門口其實設計都幾簡約幾靚,很期待入面會有咩野睇咩野買咩野食呢?



入左去之後就見到喱架人力車,是典型畀遊客打卡影相的道具景點吧!隔籬就係一個好大的碰碰車場,又令人諗返起以前去荔園玩果類碰碰車。記憶中細個時仲有D類似冒險樂園之類的迷你遊樂場會有小朋友版碰碰車玩,依家舖租貴當然不再可能有咁大地方玩碰碰車了。



望入去個賽車場其實規模都幾大幾有睇頭喎!當天去到也不是太多人去玩,基本上也不用排隊輪候,可能如果係長假期會比較旺場吧!印象中價錢也不太便宜,冇記錯好似10分鐘都要成60-70蚊,基爾都無去玩純粹做一陣塘邊鶴就算!



睇完人地玩碰碰車繼續再四圍行多陣,其實整個購物城範圍都幾大,但可惜開業的店舖就寥寥可數門堪羅雀。就如上圖這間連鎖服裝店outlet,相信任何人都應可預計到不會特別多遊客會山長水遠搭咁耐車來幫襯吧!而且折扣也不特別吸引,對基爾來說是0%吸引力……



其餘地方長這樣……眼見仲有數字屋或萬寧之類的藥妝店以及一些遊戲攤位之類,也不特別好生意;就連三數間茶廳餐或小食亭也只是小貓兩三隻,如非有舖租津貼也真不太清楚如何經營下去!若以現時經營模式看,不論係對大陸遊客還是本地人,吸引力也是欠奉。



行到邊沿地帶就更加「荒涼」了,基本上大部份都係丟空的吉舖,很多都沒租出,其餘還有些外面圍板寫上有VR War Game的體驗場地,但又聽唔到入面有人聲在玩緊喎!相信這個大型購物城要變成真正的熱門outlet消費玩樂場地,確實還有很遙遠的發展計劃,希望最終不會爛尾收場吧!

2018年4月16日 星期一

舊金山居閑話@Santa Cruz:下

站在古董報紙售賣機前呆呆地發了好一陣白日夢,可惜都唔見Jane Seymour現身(看來下次要著定套燕尾復古suit來)!無計啦,唯有乖乖回到現實,繼續行過去懸崖邊……去看海!



來到Cliff Drive喱邊明顯就是Santa Cruz這裏的超級豪宅區了吧!睇睇上圖喱間臨海大宅先,係咪有點赤柱淺水灣果種富豪別墅feel?再行近少少門口莊一莊……咦!佢幢左個For Sale的木牌在花園閘口喎,如果真係可以入去行個圈參觀就正喇!



基爾有自知之明(長期於貧窮線附近掙扎求存),咁應該連佢度木雕大門都買不起,就無謂去運吉白撞了吧!幸好由古老大屋向外望的世界級懸崖海岸線靚景,就不用花一分一毫去觀賞。



由懸崖路邊望落去下面其實仲有個細沙灘,外面來自太平洋的海浪不斷將細沙帶進峽灣裏,久而久之就堆成了這個迷你沙灘。不過可能因為冬天關係,又唔係咁多人來這裏嬉水露營喎!



好浪漫咁睇完浪之後,就漫步離開豪宅區的懸崖路,開車去wharf另一邊去睇燈塔。見到紅磚塔旁邊原來仲有條路可以行落去沙灘,咁一於先落去行一陣,睇下人地滑浪先啦!



Santa Cruz是加州其中一個衝浪聖地,Lighthouse Field State Beach喱個沙灘其實都幾大幾靚,這日來到雖然是冬天,依然唔少beach boy拎住滑浪板來顯一顯身手。單睇張相可能覺得唔算好大風大浪,但現場實際係強勁海風吹到髻都甩,近岸的白浪目測也有超過1米,不過對於衝浪男來說只是小學級吧!



睇了一陣浪之後再上返去睇燈塔,上圖紅磚塔旁的圍欄外已是懸崖了,雖然有告示牌叫人唔好跨越圍欄,但見唔少心口掛勇字的衝浪小鮮肉拎住滑浪板就咁一躍入海,一個字「型」!



睇完鬼仔衝浪咁又返入去睇燈塔先走啦!喱座紅磚建築物望落都幾古色古香,按資料介紹這燈塔原建於1967年,是為了紀念不幸身亡的衝浪者而建。門口塊板寫住1986又係咩意思呢?原來燈塔於1986年正式活化為Santa Cruz Surfing Museum。



衝浪博物館入面長這樣!地方其實一眼睇晒,主要係睇牆上掛得滿滿的滑浪名將威風照片,另外仲有些介紹衝浪歷史的圖片,唔講唔知原來Santa Cruz這裏於19世紀30年代開始已經是衝浪者天堂。不過仲有些比較恐怖的圖片,是部份被鯊魚襲擊的滑浪者講述逃出生天的經歷。



睇完博物館咁又完成一天行程了,又搭返個零鐘車返屋企。咁返去之前就梗係要先去老地方買野準備晚餐啦!喱日又係去中超永和,貪佢D菜又平又夠新鮮嘛(非廣告)!之前好似唔記得講,去美國的超市都係一定要自備購物袋(仲要係king size),平時出街都會擺定幾個在車尾箱。