2017年12月12日 星期二

散策郵誌@哥本哈根:下

上次講開哥本哈根郵誌,因為驚寫得太長太冗氣會悶親街坊,咁一於分上下兩集。有時間想再望望基爾那些丹麥舊郵票可以click返去睇上集,如果唔係就繼續跟基爾行埋餘下的陳年行程吧!


可能由於時近萬聖節,超市有好多南瓜賣;行街街行到累,不能少的當然仲有去買件cake食下

行街之餘,為食基爾當然仲有去睇下超市和糕餅店之類有乜好野食。在丹麥買野最方便之處就係當地貨幣克朗匯價幾乎同港幣係1:1(上網check過好似依家仲係),買野就唔洗拎個電話出來計一餐咁煩!當年一個大南瓜都只係30蚊;普通一件蛋糕或麵包由幾蚊到十幾廿蚊都有,視乎餡料而定,如果買3-4件會平幾蚊!


四圍無聊行街街,見到喱架好香艷的粉紅色車,應該不是的士吧


舊城區的馬車遊,看來不太多遊客光顧,價錢相信都幾貴

唔記得上面喱度係咪近市政廳,有馬車畀遊客坐,10月中哥本哈根天氣已經幾凍(唔記得係咪大約十度八度左右),坐馬車遊舊城其實都幾食西北風不太好受,夏天暑假時可能生意會好一點。


舊城區都幾多野睇,很喜歡這種華麗的大噴泉

左上圖係咪歌劇院?如果有去過就話畀基爾知……唔記得係咪正值weekend喎!看照片中有唔少街頭表演添,望落好似都好熱鬧咁(這一part完全係零記憶,好似無去過咁)!


市政廳果個大廣場都幾靚,又有另一款大噴泉,造型似隻馬都幾特別

遊客去親歐洲城市,係咪多數都要去下市政廳大廣場度睇下?Check返google map睇返先知哥本哈根的皇宮、市政廳廣場同埋美人魚像仲有嘉士伯啤酒廠和新港等旅遊區其實都幾集中!街上仲見有雙層巴士,北歐城市當中係咪算少見?同埋印象中當地都幾鬼多人踩單車代步……


終於hea蕩到去Nyhavn新港運河

新港運河區好似都係去親哥本哈根必定會到此一遊的名勝,就好似去香港例必要去維港海邊打卡一樣。當年基爾見到運河邊那一列五顏六色七彩繽紛的丹麥屋都真係幾興奮,仲有專登走去睇下安徒生果間故居。


外貌像座古老莊園大宅的迪禾尼花園Tivoli建於1843年,是現存世上第二古老的主題樂園(好奇上網check下咁最古老第一位係邊度,原來都係在丹麥,位於Klampenborg有430幾年歷史的Bakken遊樂場)


由於臨近萬聖節,主題公園大門口加裝了節日裝飾插滿巫師掃帚,仲吊了大南瓜在拱門上


哥本哈根的中央火車站,本身也是幢宏偉的歷史建築


來到丹麥又點可以唔去睇美人魚像,睇完就要上大船過大海了

睇返D陳年老照片,其實當年基爾都仲幾年輕力壯,留在哥本哈根大約兩三日都行了不少地方喎!在外港的美人魚像當然不能不去,仲見唔少操國語人士爬上去同佢合照,認真嚇親(唔知點解喱個畫面又幾深刻,時至今日寫blog時仲記得)!

2017年12月7日 星期四

散策郵誌@哥本哈根:上

近排睇電視見Do姐同農夫去了丹麥shopping,基爾醒起係時候又可以寫下D郵誌攝下時間喎!咁一於照跟……帶住郵票再遊一轉哥本哈根吧!


紅底白十字丹麥國旗果行就係丹麥郵票

好辛苦先爬到入床下底拎返本歐洲區的古董郵票簿出來……冇聽錯係「歐洲區」,基爾諗返都好佩服自己小學雞時代竟然咁有心機將所有郵票分開美洲歐洲亞洲非洲咁擺放,事隔咁多年依家重新睇返都仲好整齊好靚。頂果3張摩納哥郵票之前都有post過,中間果行係愛爾蘭,最尾紅色人像和馬車連同下面維京船果行就係丹麥郵票,係呀丹麥郵票唔算太多咋!紅色人像果張上面有丹麥皇室徽號;維京船一望就知好有北歐風情;面值丹麥克朗1KR的那張Niels Stensen是17世紀該國著名解剖學家和地質學家,獲譽為「地質學之父」。


2006年10月中出發,坐漢莎飛德國法蘭克福轉機去哥本哈根;左上圖是酒店雪櫃有好多丹麥品牌的啤酒汽水大開眼界;左下圖是哥本哈根街頭的單車徑

印象中北歐國家好多都保留用返自己的克朗,沒有加入歐元區,不過丹麥克朗同歐元有聯繫匯率機制(情況係咪同港元和美元掛勾差不多?)……Anyway講返當年去丹麥,數數手指驚訝已經係11年前的事,翻查照片資料才記得是2006年10月中去的,由於那時仲未開始在yahoo寫大典blog,咁當然也沒有寫旅行網誌了,即使睇返旅行相好似好多都無晒印象唔記得邊度打邊度,希望靠今次寫返個簡略郵誌重新喚起返少少陳年回憶吧!


下榻的酒店印象中好似都幾近市中心舊城區

跟據照片附載非常簡短的筆記所寫,原來那次出發時都幾論盡,原本是坐芬航先飛赫爾辛基再轉去哥本哈根(香港無直航丹麥),去到機場才知遇上芬航罷工,臨時改坐漢莎經法蘭克福轉飛哥本哈根……睇到喱度,基爾又醒返起當年在法蘭克福入境再飛奔去轉機的喪跑情景,中間轉機時間少於1小時未試過咁驚!


阿美琳堡宮Amalienborg Slot;皇宮廣場上騎住馬好威風的是菲特烈五世銅像;右圖是Verdensmissionssondagen大教堂

輾轉頻能咁去到哥本哈根check-in上埋酒店房都成11點幾,不過可能有jet lag又唔算睡好長時間,第二朝晨早起身出去行下,先感受一下北歐寒風,友人係教徒記得仲陪佢入去酒店附近間大教堂做早禱。之後食了早餐,再去行了一轉丹麥皇宮。


街邊掛在牆上的紅色郵筒,有丹麥皇室徽號,霎眼睇落係咪有D似英國郵筒

喱座位於舊城港口附近的阿美琳堡宮Amalienborg Slot,印象中唔係好大,似縮水版的梵爾賽,朝早來無乜人最適合任影唔嬲……


遊人駐足觀看皇宮廣場上的皇家衛兵換班儀式

阿美琳堡宮由4座宮殿構成,中央是八角形的皇宮廣場,王宮入口有御林軍把守,平日如果丹麥女王瑪格麗特二世在家,可以看到丹麥國旗升起,宮內收藏了1863年以來皇室的珍藏品,包括珍禽異獸標本,東方瓷器古董及軍火武器等。


嘉士伯啤酒廠博物館

睇完皇宮仲有去睇啤酒廠,雖然基爾極少飲啤酒,不過喱間懷舊味十足的啤酒釀製廠都好值得參觀,本身就是間嘉士伯的歷史博物館,廠房裏保留了昔日拉啤酒運貨車的馬匹(高頭大馬好大隻)和馬廄,還有重現百年前工人返工時的塑像。


嘉士伯原來都出左好多唔同product line,大部份基爾都無見過,可能只限歐洲甚至丹麥出售


運送啤酒的古董馬車


參觀完仲有得試飲,印象中橙色果杯似果汁多過啤酒

2017年11月28日 星期二

珍郵庫@竹刻

翻查大典裏面的郵票簿,原來喱個「香港館藏選粹」系列之前有寫過吳冠中江啟明畫作的首日封,最新發行的不再是選畫,而是竹刻!



看看首日封底的簡介才知,原來這個系列已出到第5輯!咁第1和2輯係乜?基爾都唔記得有冇買……Anyway,竹刻自古以來都是不少文人雅士最愛收藏的藝術品之一,突然醒起家中書桌上都有個竹筒筆筒,可說是陪伴了基爾度過十數載寒窗苦讀生涯了。



這個筆筒其實只是普遍貨色,絕不能與郵票中那些藝術珍品媲美(但當然也無損它本身的紀念價值和讀書時代的美好回憶)!竹刻大致可分為「莖雕」與「根雕」兩個體系,筆筒就是莖雕其中一種最常見的文房用品。



要讚今次的郵票設計也很有心思,直幅和橫幅兼備且錯落有序,本身就像個非常雅緻的陳列架。郵票上也有器具全貌和局部精巧的close-up鏡頭,就像親身去了趟博物館一樣!



郵票上的藝術品,由17世紀清朝康熙雍正乾隆年代到近代作品皆包括在內,包括$1.7《留青花卉草蟲紋蟈蟈筒、$2.2《圓雕水仙靈芝》、$2.9《高浮雕夜遊赤壁筆筒》、$3.1《透雕仕女窺簡圖香筒》、$3.7《圓雕古梅水丞》和$5《淺浮雕夔紋獸首壺》,大多屬於文具或者擺設之類。

p.s.換了手機之後一直沒空發掘下佢D拍攝功能,原來都幾多唔同場景mode和效果玩,唔怪得基爾果部靚仔DC都打入冷宮好耐,因為一般手機拍攝functions都夠晒用,完全唔駛麻煩又要拎DC出街(跟本都唔會記得帶)!有冇留意最尾果張,佢個景深效果都唔錯喎,真係要畀多D時間陪下個新歡睇下仲有冇其他有趣驚喜先……

香港館藏選粹:竹刻
發行日期:2017年11月14日

2017年11月22日 星期三

東來順@尖沙嘴

係咪好耐無睇過基爾寫為食blog!其實近排都好少出街食飯,即使去食都無乜影相,咁趁住喱次記得影又重操故業扮食探寫下為食網誌吧!



活於貧窮線的基爾本身就好少有機會去喱類high卡酒店開飯,喱日頂頭老細話大粒老細請食飯,咁就帶埋small potato去食一餐……



大鄉里基爾其實都唔太exactly知道帝苑係邊度?之前去尖東都只係多數直接去逛果兩間博物館,好少遊蕩過去喱邊的high卡酒店區。這次來的東來順位於帝苑地庫,主要食京滬淮揚菜。電梯落到地庫仲有個噴水池,門面係咪都幾靚幾grand!



門口reception果張桌面擺滿了好多威水獎狀,基爾當時都無去逐一細睇求其影張相就算,後來寫blog時翻查資料才知佢在2013年已摘得車胎人一粒星(同期仲有國金軒福臨門利苑阿鴻阿一添好運新斗記果一大堆食肆)。



大粒老細的紅酒聽聞係靚野,不過基爾唔識飲酒就無緣品嘗啦!趁人地摸住酒杯底咁基爾都係欣賞下D前菜先,上圖喱個龍井煙燻蛋check過係喱度的名菜之一。



前菜仲有好多,不過基爾怕醜就無謂逐樣去影,記憶中仲有水晶羊肉、黃金蔥油餅、金陵鹽水鴨幾款菜式,其實當時無menu睇當然不會知邊樣打邊樣,都係後來上網睇返先知。至於全晚最吸睛的主菜,咪就係上面喱味期間限定的鶴湖蟹影(年尾大閘蟹上市先有得食)!



咁食得京菜又點少得片皮鴨,望見這隻擁有完美健康膚色又脹卜卜皮脆肉鮮的烤鴨已知師傅非常有水準,個人覺得好味過龍門客棧和泰豊廔果D(其實基爾都唔係食過好多間咋)!另一味必食係羊肉串,傳菜上桌前離遠已經聞到陣陣孜然味飄香。喱間話係用內蒙黑頭山羊以傳統北京風味烤製,保留一點點羊羶味,基爾接受到!



除了烤羊肉串之外,這食店仲以涮羊肉出名,不過基爾都係第一次食食下飯下半場玩「變陣」,侍應突然收起晒桌上的玻璃轉盤和餐具,改為端上打邊爐的銅鍋……這種一席菜兩食方式係咪好盞鬼!



其實食完上半場時基爾已經有78.89%full(係咪細食了DD),但見下半場開波打邊爐時佢又有靚牛靚羊肉,仲有蝦串、餃子、各式肉丸和大白菜茼蒿、手打麵……最後仲有帝苑蝴蝶酥做甜品!好耐未試過110.99%full,行返出尖東見噴水池四周圍的聖誕燈飾已經亮燈,點都要行一陣當散步兼提早影下X'Mas燈飾吧!

東來順 Dong Lai Shun
尖沙嘴麼地道69號帝苑酒店B2層

2017年11月17日 星期五

周末日常之藝趣嘉年華

睇到「藝趣嘉年華」喱個題目係咪有少少似曾相識的感覺?果然好記性喎!翻查大典網誌原來上次基爾到此一遊已經係2014年11月,今年咁橋喱個11月的weekend又有時間,所以再去巡一巡這個年度盛會吧!



反正有時間咁就搭電車去維園啦!很久沒有享受過坐電車的悠閒,其實如果完全唔趕時間的話,電車確是不錯的交通工具。在電車上無無聊聊唔睇手機反而用心欣賞下街上的浮世繪,突然間覺得都幾有遊客feel。



4點左右終於hea到去維園,外圍的燈柱都掛了藝趣嘉年華的旗仔,上圖右的入口貫徹了簡約風格。至於紅色帳篷果邊係硬地足球場舉行的明愛賣物會,由於是翌日(周日)才開幕所以基爾無過去八了。



大門口這個牌坊上寫了「The World of Roald Dahl」,是今屆Arts in the Park 2017的主題。咁到底喱位羅德達爾先生係乜水?



一時間可能未必醒起Roald Dahl是誰吧!(知道果D記得在留言叫基爾畀返個叻你)……有睇過Johnny Depp做果套《Charlie and the Chocolate Factory》(朱古力掌門人)又或者Steven Spielberg拍果套《The BFG》(吹夢的巨人),就可能會認識這位來自英國的兒童文學作家。



見大舞台果邊好似有表演進行中,拿拿林先行過去睇下啦!今年個舞台設計都幾靚喎!見到個十幾廿米咁高的巨人就醒起意念來自吹夢的巨人……



可惜大舞台前面實在企得太多人,哈比人身高的基爾基本上係完全睇唔到台上表演緊D乜,只能從旁邊的大電視直播睇到係一大班人跳緊舞……提議來年個stage可唔可以搭高返少少!



看了一陣表演後,咁梗係要行埋過去另一邊睇巡遊大木偶啦!今次以兒童小說為主題,所以大部份巡遊木偶都幾卡通,有冇人認得上面喱隻小雞雞?話係來自《George's Marvellous Medicine》(喬治的神奇魔藥),唔知有冇拍成電影呢?



再去睇埋隔籬條大鱷魚先,是來自《The Enormous Crocodile》個故仔,上網睇原來都有好多集拍成卡通片喎!可能歐美小朋友會好熟悉喱條青色大鱷……旁邊果D舞蹈員衣飾都幾靚,可惜基爾今年來得太早,夜巡要等到夜晚8-9點先開始,如果著晒燈巡遊一定會靚好多啦!(想睇返上次基爾去睇夜巡的盛況,不妨click返去舊網誌:渣打藝趣嘉年華@銅鑼灣



最後再睇埋喱個擺滿晒cupcake朱古力蛋糕糖果的木偶公仔,唔駛問阿貴一定就係來自《朱古力獎門人》啦!小朋友相信都好想要Willy Wonka果張golden ticket係咪?



睇完D巡遊木偶展覽之後,又行返去攤位遊戲果邊……嘩!檔檔都好似超級多人喎!同埋大部份都係畀小朋友玩的手作坊或者遊戲之類,基爾伯伯就無謂同D小朋友逼了,在外圍遠觀一下就算。



唯一係上面喱檔基爾有行埋少少去睇,因為類似有人係度打非洲鼓和跳土人舞之類,哈比人基爾趷高晒腳伸到盡隻手舉定部手機才影到喱張相,都算叫做交到功課了吧!



度度都好逼人,都係行去D無咁多人的地方算了。喱邊喱一大幅青綠色拼畫壁佈都幾壯觀!唔知係咪全部都係學生的美術作品呢?



行埋去睇真D,原來每幀都幾colourful幾cute喎D公仔,同埋咁樣拼為一大幅牆展覽出來,又突然加添了100%藝術風味,幾正!



基爾覺得在全個嘉年華場地裏,喱part人少少其實就最適合影相不過,事實上不論大朋友小朋友都有在畫牆前擺下甫士!唔知會唔會有人想搵返自己幀貼堂畫作出來合照留念呢?



行了一大個圈差不多係時候要走了,臨走前再去八下門口果個紀念品檔,因為人太多條龍又萬里長城長又長咁款,所以基爾都無謂埋去睇究竟有D乜野免費紀念品派……

2017年11月11日 星期六

周末日常之爽爽單車遊

夏天時日日30幾度驕陽似火,真係提唔起勇氣去踩單車,一來怕熱到標汗兼中暑,二來又驚晒到個人兩截色好異相!反而秋天就似乎與單車畫上了等號,趁住涼涼地又咁好天氣,點懶都要出去踩一轉吧!



慣常見的城門河景,係咪百看不厭!Weekend來到更加熱鬧,幸好這天沒有「塞車」的誇張情況,感覺上仍算很愜意,合乎慢活的標準。



望下山再望下海,另一邊就係濾水廠,之前有聽聞想搬濾水廠入岩洞,這大片空地又可以賣畀大財團地產商大賺一筆了,將來就不復見這片靚絕的海闊天空,先把這美景永久封存在基爾blog中吧!



再踩去畫舫果邊,剛剛連這座歷史悠久的畫舫也執笠了,聽聞好快又會改建為婚禮宴會場地,唔知第時船上會唔會有部份設施作公眾開放呢?



對岸另一邊是沙田馬場,小學時學校有去過彭福公園旅行的請舉手……嘩!原來真係都幾多人去過喎!沙田彭福公園同西貢大坳門和大埔大美督係咪可以合稱為「小學秋季旅行三大至hit聖地」呢?其實唔多明白點解年年投票最終都係要揀喱幾處地方去……



緬懷完小學秋季旅行之後繼續出發,沿河岸一路踩返去烏溪沙方向。唔係講笑喎!秋天單車徑旁的石壆上,原來除了有勁多人晒果皮之外,第一次見有人晾枝竹竿在晒咸魚添喎(上圖右)!記得春天時這裏又係晒木棉花的熱門地,整片紅花海都好壯觀。



好喇最後踩到來烏溪沙個小碼頭,點都要歇一歇睇陣吐露港靚景先。這天相信仍有23-4度左右,不少大叔大嬸都愛來這裏碧波暢泳,碼頭邊也有唔少叔叔來釣魚,加埋八八卦卦做塘邊鶴的基爾就更加熱鬧了。



心水清的blog友可能會問基爾做乜唔去影影個「海洋之心」?好簡單因為來到時剛好係中午潮漲時份,心心都浸在水裏了,唔好咁懶下次就自己踩單車來睇吧!