2017年8月18日 星期五

九十風華帝女花@中大圖書館

之前睇新聞才知中大圖書館搞了個任白珍藏展,上網check展期原來到7月底就結束,基爾趁最尾果日剛好有假期就趕上了尾班車。



第一次來到中大圖書館,原來地方都幾大喎!加上正值暑假,圖書館內人影唔多見,在大門口做過簡單登記就可以入去展廳。



任白珍藏展廳其實就在圖書館ground floor,不用搭電梯,按圖書館工作人員指示轉個彎就見到,不會太難找。



與常規博物館的展覽廳有點分別,這裏的展廳採用開放式設計,基本上是劃出大堂一角就用來擺設展品了,感覺上很寬敞開揚,展廳旁邊已是圖書館的閱覽廳空間,如果看展覽看得累了就可過去坐坐稍休。



展題之所以叫做「九十風華」是因為今年正好是白雪仙的九十大壽。展品中大部份是仙姐和任白慈善基金捐贈予中大圖書館的珍貴藏品,例如上面這本古董《紫釵記》劇本。



至於上面這本任姐用過的《再世紅梅記》泥印本也很珍貴,按照展覽場刊的介紹,昔日粵劇團的泥印本一般只會印製十幾份,是戲班台柱、打鑼、提場等主要工作人員的專用劇本。



另外最吸引基爾的是五六十年代仙鳳鳴舞台演出的劇照。紫釵記帝女花蝶影紅梨記等任白戲寶,基爾只曾看過電影版,這次還是第一次看到真真正正舞台上演出的大戲劇照呢!



除了劇照外,仲有唔少任白與唐滌生梁醒波任冰兒和雛鳳一眾弟子的生活舊照,就像瞬間回到了六十年代的黑白粵語長片時代一樣,任姐仙姐的打扮在當年來說都非常之潮!



同場仲有展出唔少珠釵頭飾之類,都是手工非常精巧而且保養得完好無缺的藝術珍品,不少傳統手工技藝相信已經失傳。如果嫌唔夠喉的話,仲可以再去文化博物館,那裏珍藏了更多昔日粵劇大老倌的戲服髮釵裝飾,如果是戲迷一定看得更滿足吧!

「九十風華帝女花」
地點:香港中文大學圖書館
展期:27.3.2017 - 31.7.2017

2017年8月8日 星期二

珍郵庫@人體五感官

人體五感官都可以出郵票,今次喱個主題又幾特別喎!究竟一張小小的郵票點樣可以表達出五感呢?



今次答案在這裏係搵唔到!因為基爾都無訂到果5款郵票,只買了以樂園為主題的$10小型張,上面一次過有齊晒聽覺、視覺、嗅覺、味覺和觸覺等5個小朋友公仔圖像。

翻查資料其實今次那一套5款的郵票都值得買,據聞有些還有桃味和雲尼拿味;有些用了特別的印刷技術令郵票有仿真籃球的皮質感云云……有買到的不妨去索下舔下睇下係咪真係咁好味先?

兒童郵票:人體五感官
發行日期:2017年7月18日

2017年7月28日 星期五

川淮居@沙田

7月話咁快又來到尾聲,又係時候基爾要稍稍郁下個blog,驚太耐唔update會有人以為喱度close了!



寫為食野應該最萬無一失吧!好耐無見的旅行腳之前分批聚了兩次,其中一次來到沙田,好少閒日來到新城市,似乎人潮是少一點。可能是趁暑假關係,這次大堂的展覽以camping旅行作主題,見好多大小朋友入去帳幕和旅行車上玩自拍。



旅行腳部份因為要返工,要晚一點會合,其餘休假或退休人士(咁快退休真羨慕呢!)都幾早到商場裏各自遊弋,基爾遊了一輪無甚收穫,還是先上預訂的茶樓霸位……



由於時間尚早關係(6點幾左右),店內其實食客不多,到了7點打後就開始陸續坐滿了,但觀察所見大部份都只係做一輪生意而已,可能始終是閒日無假日咁熱鬧吧!



Anyway,會合晒所有與會人士後就order了這個4人套餐(因為某銀行卡有折)。前菜這個麻醬青瓜粉皮基爾覺得清新得來又幾好食。



點喱個套餐因為見佢菜式都幾豐富,雞鴨魚蝦燉湯樣樣都有,大路得來又合胃口。說時遲那時快,桌上迅速地來了隻醉雞,濃濃的花雕酒香味,可謂雞不醉人人自醉(即係點)!



緊接著又到熱燙燙的燉湯登場,取名為「瑤柱花膠螺頭燉雞」,味道ok而且幾足料,人均可以飲到兩小碗,當然如果自己家裏煲的還是稍勝一籌(因為可以飲兩大碗)。至於那條金腿糟蒸黃花魚基爾不太懂欣賞,略嫌多骨但肉質算是鮮美,可惜嗜魚團友今次缺席否則必可大快朵頤。



這味乾燒明蝦球原本份量頗大碟,只是吃了大半才記起忘了影相(掛住講旅行經),基爾唯有快快手手撥返埋一小碟才補影返張相,所以賣相稍為打了折扣,原本係靚仔少少。



最後的重頭戲是片皮鴨,整體來說是average水平,沒驚喜也不會有失準之作。以埋單計人均$230左右計算是不過不失之選,當然最重要其實係可以坐足全晚,單單聽領隊未來一年半載的外遊大計,也是件賞心樂事呢!

川淮居 Sichuan Garden
沙田新城市廣場一期8樓801C號

2017年7月7日 星期五

珍郵庫@數字颱風信號百周年

踏入風季經常都時晴時雨,上月中更率先掛了個8號波,唔知郵政署係咪要配合返喱種夏日天氣,就推出喱個颱風百年首日封!



在這小城長大的人應該對颱風絕不陌生,小時候總會期待打風因為可以唔駛返學……Anyway講返套郵票,唔講唔知原來香港首次用數字颱風信號是在1917年,當時按風向和風力分為1至7號;到了1931年起改為1至10號;至於現今信號系統則是1973年才確立。



全套颱風郵票有5張,包括5個級別風力:$1.7(一號戒備信號);$2.2(三號強風信號);$2.9(八號烈風或暴風信號);$3.7(九號烈風或暴風風力增強信號);$5(十號颶風信號)。



此外還有$10的十號風球小型張,右邊印了1917、1931和1973年信號圖案的改變,原來以前除了有十字和三角形之外,仲有掛圓形、長方形和菱形的颱風信號,都幾有趣喎!基爾無去過尖沙嘴天文台的開放日(太多人了),反而幾年前有去過澳門松山果個,見過那些不同形狀的風球信號,原來都幾大個架喎!

p.s.心水清blog友可能會問:紅白色果舊野好似天氣圖上的風球標誌係乜東東?其實果舊係條壓縮毛巾,包裝成風球標誌連同訂郵票時送的,不過買郵票送毛巾又係咩玩法?唔通留返打風落雨時用來抹身?

數字颱風信號百周年
發行日期:2017年6月13日

2017年6月28日 星期三

盈福28@馬鞍山

早起身有個最大好處,就係感覺上全日時間好似特別見洗!大清早去完逛一輪博物館之後,lunch就去左食喱間有點新派味道的粵菜館。



每逢大時大節去酒樓晚飯,如果無訂座真可說是一位難求(有些茶樓甚至不設訂座要親身去排隊霸位),所以為免麻煩好多時會選擇提早做節,又或者改為食晏晝飯。上圖可見這個「變陣」非常奏效,這間食店果然有大把位任坐唔嬲,唔駛勞師動眾等位咁煩。



先來的是小食:鳳凰自醉$68和沙薑豬手$68,白雲花雕鳳爪好有酒香味,基爾平時唔飲酒但都覺得幾香幾好味;至於豬手的沙薑味肯定無得輸,兩款同樣係上乘的開胃菜。



再來就是賣相極靚的松子鱸魚$198,老實說基爾因為怕骨對魚通常都麻麻地,不過喱條松子魚表面炸到好鬆脆已經夠香口,魚肉仲係無乜骨啖啖肉,對於基爾喱類完全唔識侖骨的人來說可謂極品!另外仲叫了左上圖的椰汁日本南瓜芋頭$78和左下的玉桂香鴿$38,當天去原來每台客送一隻乳鴿,非常抵食!



另外點心類叫了上面喱個花菇松露$49,造型真係好似一個冬菇,咬開入面果然散發出濃濃的松露香味,唔知價錢算唔算貴但都值得一試。店裏其實仲有幾款設計別緻的新派點心,基爾相信都係主打年輕人市場吧!連茶芥每位$10,最後埋單計約六百幾(某銀行卡有九折相當於免加一),整體而言算是可以一試之選。



講開食晏,順便講埋平時基爾返工多數帶飯,但間中都會出街lunch。至於出街通常食乜呢?上圖喱間算係其中的心頭愛,因為佢個下午茶時段真係好鬼抵食,碗飯大大碗之餘仲好平又經常有新款式揀。



之前食過佢個松露芝士煎雞飯,加埋海苔味噌湯和泡菜都只係$35左右唔知有冇記錯。基爾食過一次就無再推出可能成本貴,改左做松露芝士豚肉和牛肉飯。另一次又食左上面這個胡麻醬玉子豚肉撈鳥冬$28,餐飲轉抹茶紅豆冰只係+$5係咪好抵?基爾對佢個半生熟的玉子其實麻麻地,不過甜甜地的胡麻醬就幾好味!



p.s.反正講開食野咁又搭多段豬頭骨短blog。之前同blog友講開去街篤魚蛋,咁基爾本身就好少做喱樣野,因為通常都在家自己整咖喱魚蛋,每次煮咖喱燜薯仔時總愛加埋魚蛋一齊煮,感覺好食過街篤果D好多,自家用開果隻咖喱磚味道唔錯,想再辣少少可再加紙包裝咖喱粉,味道可自行調節。最後講埋早前U記的感謝祭,襯熱鬧走去買了件$79短袖tee,今年過了大半年就只買了這件衫,向環保綠色生活又邁進一步了!

盈福28 Fortune Young
馬鞍山新港城中心2樓2E-91號舖

2017年6月20日 星期二

繪畫‧金庸@文化博物館

睇完宣傳雷聲比較大的羅浮宮展覽之後,再行返落博物館地下果層,因為要睇埋個金庸展先走。



唔講唔知,原來金庸展已經成為文化博物館裏的常設展館,咁就唔駛經佢會咁快完結了,有興趣去參觀的,可以等有空慢慢先來睇都未遲,而且係唔駛入場費呢!



金庸館裏展示了不少屬於金庸先生的珍藏物品,包括有上圖的私人印鑒、書刊、手稿、五六十年代早期版本小說和報章連載版甚至相機等等,當然還有很多他的舊照片……



金庸由1955年寫第一部武俠小說《書劍恩仇錄》開始,一直到1972年完成《鹿鼎記》後封筆,十幾年間總共寫了15部膾炙人口的經典武俠小說,之後仲有好多漫畫、電影和電視劇版,不斷翻拍又重播,說他是二十世紀最具影響力的武俠小說作家絕對當之無愧。



依家電視正播緊最新翻拍的《射鵰英雄傳》,可能金庸人氣又再度回升,來博物館參觀的遊人都幾多。上圖右是李志清畫的郭靖水墨畫;左上圖是館內擺設的一座巨型金漆屏風,上面又係畫滿射鵰人物造型,非常有氣勢;左下圖是金庸與屏風合照,旁邊仲有最經典的一副對聯:「飛雪連天射白鹿,笑書神俠倚碧鴛」。



如沒記錯上圖已泛黃的原稿紙,上面寫的就是金庸的《笑傲江湖》手稿,這本經典小說原來是於1967-69年在明報連載,當時正值文革火紅年代,唔知同小說中的人物有冇關係呢?



另外仲有好經典的金庸武俠電視劇劇照,首輪夜晚黃金時段做果陣唔係好識睇,不過好彩後來中午經常有重播,基本上天龍八部、神鵰射鵰和鹿鼎記重播得最多,故事人物最熟悉,展廳裏仲有重播八十年代經典劇集片段,依家我諗電視台就唔會重播了(畀錢頻道好似有得睇)!



上圖用明報陳年日月logo信紙寫的又係乜東東?睇睇佢個簡介,原來係「1988年查良鏞致明報編輯部手諭」,當中談到明報副刊的方針,還有逐一評說明周、明月和明報,提到新聞版風格要做到「新聞副刊化,副刊新聞化」……明唔明?



再睇埋明報明周創刊號,原來明報是在1959年開始發行,數數手指原來都有差不多60年歷史。依家報紙多數跟英文由左向右讀,以前就是由右向左讀,比較特別。另外,關正傑和射鵰果兩隻碟基爾家中都有喎!不過當然是復刻版而不是這裏展示的原版。



記憶中基爾細個時有在報紙上追看過每日連載的衛斯理科幻小說,但金庸的就沒看過,上面這張副刊是六十年代產品,連載的是《倚天屠龍記》。話時話依家報紙仲有冇連載小說呢?可能時代唔同了,已經唔興了吧!



走之前記得要玩下喱個「高手過招」真人融入漫畫的玩意。基爾見成班印傭姐姐爭住同漫畫人物影相玩得好開心,而且影出來效果又真係好逼真喎,幾有趣!

「繪畫.金庸」
地點:沙田香港文化博物館
展期:1.3.2017 - now

2017年6月12日 星期一

羅浮宮的創想@文化博物館

成日掛住睇郵票和聽CD,基爾近排好似真係少了去巡博物館,不過近排有幾個大型展覽都好值得去睇下,近近地先去巡一巡文化博物館,睇睇個宣傳雷聲幾大的羅浮宮展覽吧!



咁耐以來好似都未試過晨早出沙田行博物館咁神心,所以一直唔係好知佢幾時開門,以為政府部門都係開9:00am吧!點知老定的基爾9:30am迤行到去大門口時,只見到成班叔叔嬸嬸在晨運耍劍耍太極,發現原來博物館要到10:00am才開門,這就是太懶唔先上網check之過……



Anyway咁都無計啦!唯有先在博物館外圍行下睇下野,基爾睇見巨柱上的裝飾才知道原來除了羅浮宮展之外,現時館裏仲有個金庸展都好值得一睇,一陣入去要預留返少少時間睇埋金庸展先走!



迤蕩左一陣之後,突然醒起可以行返去中央公園果邊睇D野,咁就無謂浪費時間先行返去遊公園吧!晨早留留去行公園真係好有晨運feel,將來能有這種退休生活也真不錯。平時假日來公園都幾多人幾嘈雜,不過原來閒日朝早來又回復了小橋流水的清幽境界。



基爾其實唔exactly知道想搵果樣野在公園邊弗,只好在公園裏亂蕩走一圈憑記憶找找吧!最後果然皇天不負有心人終於找到上圖喱棵植物!睇blog友介紹先知原來HK也可看到紫藤花,比較多的是在沙田這公園裏(另一處是長洲某涼亭)。



問問公園掃地阿姐確定這片翠綠的藤蔓就是紫藤,基爾初夏五月天來到當然不可能欣賞到紫藤花盛放,估計都係要早春二月時節先有機會睇到(當然不要期望有日本果種瀑布式氣勢)。既然賞不到紫藤花就順腳行過去水池邊睇埋睡蓮才走,幸好蓮花是幾乎四季也盛開的。



在公園無無謂謂行一圈之後睇睇錶時間也差不多,再沿城門河邊單車徑行返去博物館。返到去大門口發現開始有人排隊,仲有好多幼稚園小朋友來參觀,唔知係咪因為周三免費日所以特別多人,不過如果去睇羅浮宮展覽就一樣要畀$20門票。



排隊買完飛趁仲未係好多人就火速上2樓,羅浮宮展廳外除了有皇宮實景壁畫之外,仲有個幾靚的發光三角金字塔裝飾,都算佈置得幾像真度高、幾有心思!至於展廳入面有乜特別野睇?因為唔可以影相所以就冇post了,令基爾覺得有趣的是,記得2004年去巴黎時都有入過羅浮宮,果陣真係不論中外遊客都可以不停舉機對住各式名畫係咁狂影相(唔知依家仲得唔得),依家運到來香港反而唔畀影相,係咪有少少奇怪?總括而言,在眾多展品當中基爾印象最深係那三大幅掛氈畫,真係由樓頂一直掛到地面好大幅好宏偉壯觀!



其實唔影相最大好處就係唔會有人阻住睇名畫雕塑,全程可以安心細賞。不過如果之前有去過巴黎羅浮宮就可能沒有太大驚喜,始終運來的珍品不太多,而且差不多一半展廳用來介紹羅浮宮的800年歷史,老實說吸引力比真正看藝術品遜色得多!另有一part就主力介紹新開的伊斯蘭藝術館(有點賣廣告feel),將來如有機會重遊巴黎都想去逛逛那個新的伊斯蘭館。上圖是另一處互動資訊展廊,除了有led版蒙羅麗莎可供遊人拍照之外,仲有古埃及木乃伊仿製品和古董大鐘。

「羅浮宮的創想:從皇宮到博物館的八百年」
地點:沙田香港文化博物館
展期:26.4.2017 - 24.7.2017

2017年6月8日 星期四

So Thai So Good@大埔

行行重行行,上次提到某周末來到大埔行街市又逛過古蹟,之後沿天橋商場過商場咁慢慢行到去大埔超級城覓食。



唔記得上次來已經係幾多年之前,印象中這裏以前係咪吉之島?依家同樣係日式百貨公司,但變了成為一田。因為沙田比較就腳,基爾通常都係去沙田果間一田;至於大埔喱間就細少少,第一次來其實入面都係果D攤檔舖位,中庭就有個特價區散貨場,想執平野都不妨去睇下。



不過基爾去到時由於已經成晏晝點幾鐘,襯住仲係lunch hour就同基爾媽先去醫肚吧!行過商場2樓見有喱間So Thai So Good入面有大量吉位,唔駛諗立即入去試試……搵個靚位坐低望望個menu,原來有個幾抵食的lunch set只係$62,而且選擇都幾多喎!



上圖左見到頭盤,可以揀泰式青木瓜沙律和大蒜薯仔湯,因為叫左兩個set咁就兩樣都可以試齊,味道同樣算係above average!主菜方面有7樣粉麵飯揀,其中一樣揀左少少辣的香蒜辣椒西班牙腸意大利麵;上圖右是另外叫的蝦沙律,入面都幾多腰果蝦仁和芒果,幾fresh幾好食!



至於lunch set另一主菜就叫了上面喱個泰式香草包糠焗龍利柳配薯條,同樣係不錯之選。另外幾味想試的仲有香葉辣椒肉碎炒金邊粉、海南雞配油飯、紅酒燴牛肋條配白飯、冬陰海鮮炒飯和番茄煙肉菠菜意大利麵,可惜基爾當日唔記得帶個大少少的胃來,咁唯有留返下次再試吧!

p.s.個lunch set本身包凍/熱咖啡或茶,如果+$20可轉配乳酪冰飲,佢個乳酪冰好好飲值得一試!

So Thai So Good
大埔超級城B區2樓202號舖

2017年6月2日 星期五

Weekend無聊周街hea@大埔

之前提過某weekend見天氣不錯,反正有沒事做就跟基爾媽去了一趟大埔行街市!



由於天氣已經開始有點夏日的暑熱氣息,咁就費事踩單車,舒服D搭火車去!不過每逢周末,都估到喱個火車站係勁多人,好多都係準備聯群結隊去碼頭搭船出吐露港D小島郊遊……



火車好快就去到大埔,車站一樣係堅多人喎!例牌先上商場行一圈,順便去個廁所先。商場其實都無咩好睇,都係D例牌店舖,嘆左一陣冷氣就出發行過去街市,途中在小教堂對面見到上圖喱架型仔紅色跑車。



第一站先來到樹記,唔知咩事喱日去到度度地方都係咁多人,連去買腐竹都竟然排長龍,一早知喱間賣腐竹出晒名,不過要排隊買又真係有點誇張,閒日來係咪會好少少呢?



回家後已食過這些名牌腐竹,基爾諗如果用來煲腐竹雞蛋糖水確實係幾唔錯(因為好快煲到開花爛晒),味道亦ok,但又不至於好食到飛上天花板……Anyway,趁基爾媽排隊時,自行走了去對面街睇古蹟先!



其實幾年前基爾都有來過這處古色古香的大埔舊理民府,當時剛活化為童軍總會(有興趣可click入去睇返),記得仲有入過去閃巡一圈。



上次好似由鐵道博物館那邊行上小山,今次則由另一邊的運頭角遊樂場斜路上山,沿路會經過網球場,基爾仲企係度睇人打左一陣波。



唔浪費時間繼續往上走,幾分鐘就來到舊大埔警署,依家活化了成為綠匯學苑,大門口保留了昔日戒備森嚴的藍色大鐵閘,係咪好有警署feel。



警署主建築群建於19世紀末1899年,是新界區第一所警署,一直運作至1987年關閉荒廢。到了2010年嘉道理農場獲批負責活化復修舊警署,變成現時的綠匯學苑。



不過原來入去參觀前要先到辦事處辦理登記手續(仲見到有條人龍排隊),為免基爾媽在山下面街市等太耐,就無謂入去仔細巡一圈了,只在外圍花園看看算數,留待下次有充裕時間再來吧!



之後再行過去另一邊山頭的舊理民府,喱邊果座兩層高的紅磚牆建築其實仲宏偉,很有點19世紀英式大宅的氣派。



舊理民府約建於1907年,是英國向中國清廷租借新界後最早修建的民政中心,新界北部的行政及土地註冊工作均在此辦理,直至1961年理民府內仍有一個裁判法庭。



上次來可以入內參觀,今次則剛好遇著大維修,所以大宅不對外開放。理民府早於1981年已列為香港法定古蹟,到2002年經活化後成為香港童軍總會新界東地域總部。



拿拿林落返山重新會合返基爾媽(驚畀人鬧無尾飛陀),不過可能佢等得太耐已自己行左去街市那邊四圍行下,好彩有電話咁就唔怕失散啦!



行去街市會合返再買好晒野,見好似有點意猶未盡,咁行埋過去超級城果邊食埋lunch先返歸啦!由於係天橋連天橋商場過商場咁行過去,所以都幾方便易行,途中還在林村河上看風景,係咪都幾靚呢!(未完待續)