2016年7月7日 星期四

隨心@鯽魚涌

失經無神要OT的情況似乎沒有太大改善的機會,不過喱晚因為一早約左人所以要用一次免死金牌不顧一切地走。



友人揀喱間星馬菜,相信並非因為有咩特別好食推介!印象中喱個舖位年前係間土耳其菜館有幫襯過一次,不過應該係閃電執笠之後又另外再開這間星馬菜……



在卡位坐低,咁既然來到食星馬菜多數都離不開海南雞、串燒或者炒貴刁之類。一早知喱區食飯向來有點貴(或許基爾真係太耐無出街食飯唔知米價),但仍覺得喱碟海南雞飯$78,以雞的份量來說算是太少了吧!旁邊$88的巴東牛肋條份量好像也有點「小器」,而且味道有點過咸。



至於沙嗲串燒6串$60似乎也只是一般不算突出,印象中不香也不太熱之餘,肉量也只有半枝竹籤,話晒都成10蚊一串架喎!由於點幾味菜式都麻麻地,原本有意order 2nd round都係作罷。



後來見鄰桌都有點炒貴刁或者喇沙之類,唔知會唔會好食D呢?不過可能先入為主暫時都不會再去幫襯了。比較有趣係餐廳內同時有另一桌打晒燈影食物照,又叫了滿桌菜式仲有個貌似老闆的在旁介紹,唔知係咪有雜誌做採訪呢?

隨心 With Your Mind
鯽魚涌海光街12號

2016年7月2日 星期六

羅馬海軍與龐貝@歷史博物館

今年暑假有兩個最想睇的展覽,之前已經看了文化博物館的莫奈畫展,至於另一個關於龐貝古城的文物展心諗同樣不能錯過。



大熱天時實在無乜地方可以匿,如果行厭了商場的話,去戲院或者博物館都是不錯的消暑選擇,例如歷史博物館今期展出的羅馬海軍及龐貝文物就幾值得一睇。



上圖是展廳正門築起的羅馬輸水道拱橋模型,設計都幾靚幾有心思。入場券上面有展覽的名稱「Mare Nostrum」意思是「我們的海」,是古羅馬人對地中海的稱呼。



展廳外面的免費區有些攤位,上圖喱個好似係教小朋友用橄欖枝織花冠。雖然暑假才剛開始但都幾多學生和小朋友來參觀。



話明係龐貝文物展,咁點都要有座火山模型先似樣,雖然係假左少少但都幾高幾盞鬼,旁邊仲有介紹火山爆發的地理知識。原來在1億年前,香港也是位於火山活躍地帶,西貢大埔一帶都有大量活火山,現存仍有好多花崗石之類的火山岩石。



此外仲有好多介紹羅馬時代社會民生的展板,有些基爾都曾經讀過但早已還返晒畀History老師,睇完又真係有返少少回憶。



如果鍾意影相的話,就要係喱度影多幾張先好正式入場了,上圖喱幅火山口3D畫現場睇完全唔覺有乜咁立體,但原來鏡頭下影出來又真係幾像真度高喎!



影飽之後可以入場睇文物了,展廳裏佔三分二都是羅馬沉船的文物,餘下三分一才是龐貝部份。龐貝那邊的展廳老實說做得有點求其,原本期望多多少少會有些模擬古城的民居街道裝修設計,事實卻只有較常規的展櫃和展板!(記憶中年前那個凱撒大帝展更有趣)另外那段介紹「維蘇火山爆發的一天」的3D動畫短片也著實無聊……幸而仍有很多沉船古物和龐貝古城的馬賽克鑲嵌畫,還有龐貝和赫庫蘭尼姆遺骸模型都非常值得一看,至於導賞員也可記一功,介紹得好生動有趣又聽得清楚,挽回不少分數!



用了兩個幾鐘睇晒所有展品之後就走人,因為下一場要趕返去旺角睇戲,之前收到舊同事送飛睇上面喱套印度片Brother Bajrangi,上映的戲院不多,幸好較就腳的Moko有,咁一定要去睇啦!近年好似唔少人愛上看歌舞連場的印度電影,基爾則無特別偏好,影片雖然長近3個鐘但也算拍得緊湊熱鬧,笑中也有感動位,故事主題離不開大愛無疆不分膚色種族宗教國界,簡單而言是宣揚印巴友好的樣辦戲,不過當中有唔少講到印度的民生習俗起居信仰細節都幾有趣。全片要數最吸引基爾眼球的,莫過於後段主角千辛萬苦帶著小女孩終於重回Kashmir山區的部份,雪山風景真係靚到絕,好有飄零燕的瑞士風味。唔知將來有冇機會親身去喀什米爾欣賞下呢?

「海上雄師:羅馬海軍與龐貝古城」
地點:尖沙嘴香港歷史博物館
展期:8.6.2016 - 29.8.2016