2015年4月28日 星期二

2014古都瀟瀟@清水舞台

來到Day3天氣似乎有點不穩定,大清早起來時已一直下著綿綿細雨,而且感覺上都幾凍,唔知會唔會見到落雪呢?



由於落雨所以都唔打算去太多地方了,喱日主要諗住留在京都四圍閒蕩吧!不過出發前先去酒店大堂check-out並寄存好大件行李篋,只需帶備一套換洗底衫褲、背囊和跟身物品已足夠今晚在嵐山睡一晚。搞掂晒即在京都驛巴士總站搭車先出發去清水寺,上圖右是清水寺山門內不遠的隨求堂。



好多人應該都去過清水寺,它聳立於京都東山區音羽山山麓,與北山的鹿苑寺(金閣寺)和西面嵐山的天龍寺並稱為京都三大世遺古剎。上圖是清水寺裏的經堂,自1995年關西大地震開始,寺院每年都會選出一個「今年之漢字」,2014年獲選的是「稅」字。



上圖是三重塔旁的開山堂,這時雨越落越大了,路經的三重塔披上了布幔正在維修就沒有影了,只影了遠山遍霧遍雨的紅葉景。其實一面撐傘一面影相難度都幾高,為免淋濕相機所以也沒拎出來,全靠手機搞掂!



12月中寺內雖然只餘下少量金黃的銀杏葉,但依然覺得景觀幾靚,可以想像若早大半個月來一定好壯觀,遊人也墟陷十倍吧!網上search見清水寺秋祭時還有夜景可影,紅葉夜景非常靚,很值得一遊。



來到清水舞台主殿發覺原來遊人也頗多,可能大家都進來避雨了,也順道小休一會。清水舞台是清水寺的主建築群,一般相信始建於公元778年(約中國中唐時代),現存建築為1633年(約中國明末時代)重建。



修築在山麓上的主殿舞台結構巧妙雄偉,總共由410支高幾十米的圓木巨柱支撐,採用了技術高超的懸空楝樑式設計,不使用一根釘子,在日本古代木建築中極為罕見。上圖是由舞台往下望,見到不少人在音羽之瀧前排隊「輪水」。



由於落雨關係,大殿裏更見幽暗,裏面見有不少善信在祈福祝禱,基爾為免打擾只留在殿外參觀算了。大殿外還擺了不少「護摩木」和祈福木牌出售,遊人可在護摩木上寫上祈禱文祈求神明保佑。



由上圖可以見到遊清水寺當天雨勢有幾勁,很難想像深秋時份仍然會落這種滂沱大雨……雖然如此卻沒有令基爾打退堂鼓,主殿北側長長的石階上還有一座「地主神社」,上面大大的掛了一個「緣」字,莫非是求姻緣的神社?



大雨中依然有不少善信拾級而上,地主神社以「戀愛成就」和「良緣達成」聞名,是著名的日本月老,唔知有冇blog友來過求姻緣呢?

2015年4月22日 星期三

花墟+八幡屋:下@旺角

去花墟睇完活化的戰前唐樓Good Point之後,再在花墟附近行多一陣賞花,就準備行落去兆萬那邊赴會了。



之前睇過幾位blog友去幫襯喱間八幡屋食日式放題幾抵,所以一早已bookmark定想去試下。其實基爾都已經有好幾年無幫襯過喱類日式放題食肆,主要原因係不太喜歡限時太短,好多時滾水淥腳地食完就要走,少了慢慢撐台腳傾偈的樂趣……



二來日式放題經常慣性漏單,也是件頗令人煩厭的事;三來基爾向來細食所以盡量少參與放題和buffet活動。說來真有點大鄉里,基爾還是第一次飲上圖這款康師傅番石榴汁飲品,都幾唔錯喎!



感覺上這間八幡屋提供的點菜紙種類頗豐富,前菜冷盤沙律之類都有好幾種,而且平心而論都幾好味道,算是水準之上吧!最重要是入單後沒有嚴重漏單消聲匿蹟石沉大海的無奈感!



至於時限方面有2個鐘,比一般的1.5小時稍長,感覺上明顯無咁趕頭趕命,至少食野途中係有傾偈空檔時間……上圖可見壽司款式的選擇也頗多。



當日基爾是食比較便宜的「頭圍」5:30-7:30pm,人均$158(未計加一),以今時今日的日式放題料理算是抵食吧!上圖是天婦羅和甜品,灰色那碗不是芝麻糊而是磨菇湯。



另外還order了日式炒蜆、溫泉蛋、千舌大根煮之類的小食,燒物則叫了幾round甚好味的鹽燒牛舌、多春魚、汁燒帆立貝等(但帆立貝味道太淡)。此外還有好多唔同款式的手卷軍艦、鍋物和簡單的甜品……



雖然只有兩個鐘但絕對夠時間食得飽,仲有就係食「頭圍」有個好處︰食飽仲有大把時間四圍逛逛。最後逛到返上去新世紀,覺得個商場大裝修完之後真係闊偌好多好行好多;行了一陣Prologue書店,其中有一part相展專門拍攝星軌,又真係影得幾靚喎!

八幡屋 Yahataya Japanese Restaurant
旺角西洋菜南街兆萬中心9樓

2015年4月16日 星期四

花墟+八幡屋:上@旺角

感覺上已經有好幾個月無出過旺角(一來怕人多二來無乜特別野買),喱日出去當然順道也去逛逛剛開放不久的花墟Good Point吧!



以往行花墟經常會路經過這一整列的舊唐樓,不過由於是私人住宅所以當然無可能登堂入室參觀,早幾年市建局豪花億元陸續收購業權並於2008年宣布活化計劃,現時部份重修工程已完成並出租予社聯的Good Point。



這種4層式的戰前舊唐樓目前在油尖旺區仍有不少屹立不倒,但大多只是零星一兩幢暫仍未受地產財團羅致拆卸重建,至於像太子花墟這一整列戰前唐樓建築群規模可說是市區碩果僅存的,能保育下來也算幸運,現已被評為二級歷史建築。上圖是其中一幢已開放的唐樓,大門內有一列信箱和水磨石樓梯。



據網上資料描述,這列唐樓群落成於1932年,由比利時上海義品地產公司興建、比利時籍法國設計師G. van Wylick設計,運用了20年代極流行、源於法國的「藝術裝飾」建築風格(Art Deco),喜用簡約線條、幾何圖案,直線、橫線、方形、菱形、三角形是常見的表現形式。上圖左可以見到1樓「天經地義生活館」的幾何圖案窗飾……



當天基爾比較有興趣參觀2樓的JL Ceramics Concept Shop,那是著名陶藝家梁冠明的陳列室,裏面擺設了不少20-30年代的玻璃器皿、瓷器、竹器、江南土布和古董家具,更珍貴的是單位裏仍保存了原裝的大露台、紅色圖案地磚及法式對開門,感覺就如突然時光倒流返回50年代粵語長片中吳楚帆張瑛身處的豪宅場景中一樣,煞是有趣!

p.s.比較可惜的是基爾見店門外早已張貼了不可拍照的告示,所以也就無謂厚顏去影相了,只與店員閒聊了一會,卻也是件樂事呢!如果想感受下置身粵語長片豪宅中的感覺有幾特別,就要抽空親身去逛逛了。

2015年4月12日 星期日

珍郵庫@天文現象

復活節期間仲有一件幾有趣的事,就係周六那晚可以見到月全食,唔知有冇人記得去睇呢?基爾當晚都有特登落街睇下,月全食的短短數分鐘期間可以清楚看到月亮呈現暗紅色,有點神秘感!



其實郵政署在3月中也發行了一套以「天文現象」為主題的首日封,唔知係咪為了配合喱次罕見的「連環四月食」而設?下圖是$10的月食小型張,簡單介紹了月全食和月偏食的過程。



另外還有一套6張的郵票,包括$1.7的日食;$2.2的流星雨;$2.9的彗星;$3.1的土星環變化,以及$3.7的太陽黑子和$5的行星合月。



今次個郵戳設計也頗特別,同樣以4月4日晚的月全食為主題。至於「連環四月食」餘下最後一次會在9月28日出現,不過香港位置不會看到。



另外值得一提係原來香港郵政以往較少以天文現象發行郵票,對上一次竟然已是30多年前的「哈雷彗星」,基爾記得當年都有去買喎!

天文現象
發行日期:2015年3月17日

2015年4月8日 星期三

Jamie's Italian@銅鑼灣

復活節長假期基爾有幾日要照常返工,假期不多所以也沒外遊去,反而留在香港可以享受多一點難得的寧靜,搭車返工放工也不用逼非常愜意,某日提早收工還可蛇出銅鑼灣開餐。



特登問定友人係邊度會合(好讓基爾取捨坐巴士定地鐵出去方便D),點知出到Hyson又話已經過了去Time Square,咁順便睇埋喱個「Avengers復仇者聯盟2」宣傳攤檔先啦!但其實感覺有點求其,而且巨型模型公仔實在太少了一點……



Time Square那邊相信應該一年365日都多人吧!在人海中穿梭尋覓最後會合後再hea行過去登龍街。以前返夜時,間中會與同事來打邊爐,依家原來隔籬開多間日本料理小店格局的人氣食肆,門口排了長長人龍(店裏座位不多),下次有空也可來試試……一直行到街尾就見到Jamie's Italian招牌高高掛在商場外。



好彩提友人先book台比較穩陣,始終紅字假期walk-in未必有位;另一樣係限食2個鐘比較無奈,以為日式放題才會這樣。Anyway,坐低之後欣賞下餐廳四周環境其實都幾靚,有bar台位、有卡位、普通2至4人餐桌等,地方都頗大喎!



諗住用「拖」字訣啦!想坐耐一點傾下偈,所以一於散叫,而且要逐樣叫,一來可以慢食,唔驚掛住傾變晒冷盤;二來斷估佢唔會夠兩個鍾即烹人走。



三來其實睇佢個Easter Set Dinner又真係唔吸引也唔太合胃口,散叫也未嘗不可,不過比較搞笑係友人竟然仲慢條斯理做功課,上網睇人地「開飯」D食評,仲要每樣核對研究menu上邊樣好食邊樣唔好食,搞到waitress姐姐走幾轉來問落單(在此要畀讚佢,不僅全程零黑面,仲有誠意推介部份菜式,畀著基爾一早殺了喱D煩客人)。



看網上介紹話Jamie Oliver在英國開的餐廳數目頗多,但海外分店全球則只有9間,聽聞銅鑼灣之外仲會在尖沙嘴開分店。基爾入座時才6點幾,坐的corner位人客不多(7點後開始滿座),可以趁機四圍影下廳餐裏的陳設……上圖左兩罐意大利罐頭蕃茄醬係waitress隨意擺低的,笑問她係咪送給客人的紀念品?!



先來的是這個炸意大利飯丸子小食配蕃茄醬Mozzarella芝士$70,外脆內軟的口感頗特別,同食一般多汁黏口的意大利飯感覺有很大分別,喱味係見「開飯」有人激讚才會叫。



另一味十個有七八個都叫的就係上面喱味Cured Meats,姑且叫佢做意大利傳統醃肉併盤吧!這裏是2人份量$168,特色係用了一塊又厚又長的大砧板上台,上面精緻地擺滿了橄欖串、開心果意式肉腸、茴香莎樂美腸、火腿及辣肉腸,仲有幾片三角羊奶芝士(嗒落有一點點臭)配甜辣醬、水牛芝士同其他幾種醃小黃瓜醃菜、紅蘿蔔絲和紅菜頭沙律等,份量其實都幾勁!至於果兩罐蕃茄醬就係用來托起喱塊併盤大砧板而設的。



聽waitress姐姐介紹話佢地個廚整海鮮特別拿手,尤其係魷魚和蜆的菜式,咁就叫埋喱味酥炸魷魚,食落感覺有點似意式的椒鹽鮮魷,特別喜歡那個酸忌廉醬和蒜片配菜,非常香口!



另外仲想試多幾味main dish,包括上面喱個肉醬闊麵Tagliatelle Bolognse,不過驚太飽只叫了mini size,share來食每人基本上只有兩三啖,但少食反而多滋味,而且幾好玩!



另外當然仲有叫waitress推介的蜆類,所以叫多樣蜆肉意大利粉,友人話咸了一點,基爾覺得頗具海洋味道……雖然只係樣樣食少少,但最後其實都幾飽,埋單計人均200幾唔算太貴吧!比較有趣係tips可以按個人喜好而付,所以不一定是慣常的加一服務費!

p.s.最後也可講少少餐廳的裝修陳設,天花板帶點raw的味道,至於個半開放式kitchen和懷舊bar台都幾有特色,睇返網上介紹文章話係取材自God Father電影中的意大利傳統菜館設計,基爾坐的corner位又擺設了不少廚具和Jamie Oliver的烹飪書作裝飾;最後必須提提廁所有個古董式的抽水水箱和復古水龍頭真係好靚,可惜基爾去廁所時沒帶手機,否則一定影來留念!

Jamie's Italian
銅鑼灣登龍街金朝陽中心2期Midtown2樓

2015年4月4日 星期六

2014古都瀟瀟@豪牛夜宴

急急腳行完個「夢與光」燈飾祭之後,基爾又要急急腳趕去下一場精彩節目。到底係咩咁吸引?



當然又係離不開食大餐,因為之前已book了台去食神戶牛。這間Kobe Plaisir是位處一間不起眼的小型酒店樓下地舖,由燈祭場地行返三宮驛,再要穿過行人天橋和幾條橫街,問了幾個警察叔叔和路人,幾經轉折才終於找到,果然不負有心人。



餐廳入面其實都幾「骨子」,圍住鐵板燒餐台只有十個八個座位而已,去到時剛好有一對男女吃完離開。



Menu上的選擇不太多,基本上就是ABCD餐,價錢由11000至23000円不等,有但馬牛和神戶牛兩款選擇,唔知有咩唔同呢?



基爾預訂的是13000円的B餐,上網仔細睇返到底食了乜先:上面應該是一開場食的一小碟很有粟米味的餐湯(但碟子相當大);上圖右是美肌酢和食前のお愉しみ3種,3款餐前小食包括有豆腐和魚生之類,賣相都好精緻吧!



幾乎忘了說餐前侍應會貼心地為客人逐一戴上餐巾圍裙,全程一路食一路睇住廚師在面前的鐵板熟練地烹調各種食材,本身已是一種視覺+嗅覺+味覺三重享受!上圖是甚美味的烤鵝肝和海鮮料理,連蝦腳也煎到脆卜卜。當然還少不了main course裏的神戶牛……



神戶牛可以自選煮熟程度(廚師會向客人逐一細問),向來不太吃牛的基爾都覺得味道是無可挑剔的了。不過如果剩食啖啖牛肉似乎又有點寡,襯上新鮮烤雜菜沙律就是完美絕配!



咪流口水住!基爾食完牛柳和沙律之後已差不多七成飽了,就在這時師傅將一大碗飯倒在鐵板上快手地炒呀炒,真係好似去飲咁,食埋喱個炒飯真係飽足九成,即使大胃王來到都唔驚會complain食唔飽!



食飽飽飲埋杯果醋後(特登留返小半杯餐後飲),侍應就來替客人「寬衣解帶」(解除餐巾圍裙),當然唔係似香港某D放題食肆咁衰限坐個半鐘就要趕人埋單走人……原來跟住個step係侍應會有禮地請客人移玉步過隔籬的華麗偏廳繼續品嘗dessert而已。值得一提係在等候「過廳」期間,同場仲會加映廚師即席表演清洗鐵板的神乎奇技,真想問問佢地D清洗用品係咩牌子和在哪裏買,看著廚師乾淨利落的手法轉瞬間已令眼前的鐵板光潔如新非常神奇呢!



甜品其實不太特別,有布甸和雪糕,還有一小杯甚香濃的咖啡,不過可以坐在這間有水晶大吊燈裝飾的華麗偏廳hea住作餐後小休傾陣閒偈就是亮點之一。另一邊無影到的是一整列的書櫃,霎下眼真係有點似都教授家中那個私人書房咁有古典味呢!



在「都教授書房」hea夠兼埋單之後就起程返京都了,好彩搭到特急車所以都算幾快,幾乎忘了在經常出入的車站和酒店留影,大堂的聖誕樹雖然不太大棵但都幾靚吧!