2015年9月26日 星期六

浪人日本料理@灣仔

旅行blog寫晒,又係時候搵返食探出來撐場攝下時間!不過今次喱餐其實又同旅行有少少關係,因為係基爾同D旅行鐵腳去聚餐。



山長水流去到灣仔食喱間浪人,最主要係貪佢不設時限。今時今日食日式放題多數係限兩粒鐘甚至個半鐘,實在太趕唔符乎基爾hea傾hea食原則,所以雖然遠係遠D都訂喱間啦!



基爾對灣仔駱克道一帶完全無甚概念,好彩兜了幾個圈之後都搵到。6點上到去發現班旅行腳未到,基爾先入座霸佔有利的卡位,貪佢有半截日本垂簾有點私隱,也唔會好似坐出面大廳咁人聲嘈雜,事實果然無揀錯,因為7點後出面坐滿人真係嘈到似街市,完全無可能悠閒傾密偈。



十數分鐘後人腳陸續到齊拿拿林剔紙開餐。先談談價錢,話明係放題兼唔限時任坐,收費自然較限時限刻趕人走果隻貴少少。基爾假期去人均HKD$330,閒日平$30左右,如果同一般酒店dinner buffet比較要平呢!上圖係先來的小食和沙律類:日本枝豆、甜薯和中華沙律。



至於點菜方面都係同一般日式放題一樣剔紙仔,這間浪人提供的菜式紙仔選擇頗多共7款,要讚的是令人煩厭的漏單情況不多,侍應追單執台斟茶的服務態度也良好。上圖是另一款沙律:青瓜螺肉蟹籽沙律。



其實剔紙仔時,大家都係見到咩想食就照剔了,沒有什麼先後次序可言,當然上桌時也是琳瑯滿目大雜薈乜都有(食唔切咁滯)!當然寫blog時就要先分門別類以妨blog友睇到眼花繚亂啦!上圖喱款和風沙律賣相頗靚,同樣是屬於A紙的小食及沙律類……



B紙係刺身、卷物和手卷類,上圖是海膽手卷和蟹羔手卷。由於沒有剩海膽刺身(可能驚蝕本),想食海膽就要叫手卷先有得食。不過始終飯類比較飽肚唔食得多,連C紙的手握壽司類也完全無剔過。



旅行腳主攻的始終係刺身,有咁海老(甜蝦)、帆立貝(帶子,基爾的至愛),少不了仲有三文魚、魷魚、八爪魚……之類,不過頭輪來時都只係細細一碟,好似唔係幾夠喉喎!



不過食到去9點幾十點臨打烊前夕就完全唔同晒!成大大碗刺身上桌真係好「宏偉」,好似big sale益街坊咁款,三文魚、甜蝦全部大大件,仲有油甘魚、北寄貝、馬刀貝、象拔蚌、榮螺和黃色那種希靈魚,堆到成座山咁壯觀!飽過食buffet……



旅行腳當中除了有「刺身精」之外,仲有「天婦羅精」和「燒物揚物精」。上圖是燒雞中翼和燒車厘茄,都係屬於D和E兩張紙上剔的。



天婦羅和揚物類以上圖左的吉列廣島蠔最正,好新鮮唔會腥,而且外脆內軟超正,基爾都食了好幾個,勁熱氣!另外仲有天婦羅甜薯也頗有趣;右圖的天婦羅南瓜和沙維魚第一次食。



再睇埋其他燒物和F紙的一品料理類,上圖右是辣汁煮花螺和燒鯖魚;圖左則有鐵板牛柳粒和青絲海蜇。基爾雖然唔太食牛但都覺得牛柳粒幾正(比另一款燒牛舌好味得多,因為牛舌有點韌),尤其係灑上面的脆卜卜炸蒜真係超正,老實說比牛柳粒還要正……



上圖的炸蓮耦片也脆口,是不錯的選擇。由於食得太多燒物炸物,心理上點都要叫返個炒雜菜平衡一下。另一樣不能不提的是G紙的飲品及甜品,基爾覺得喱杯巨峰乳酸梳打實在是拍案叫絕,有提子清香但不會太甜,而且都好大杯。餐裏其實包了一個drink和一款甜品,如果鍾意可以encore多一杯,都係加多HKD$18而已。



由於實在太飽,基爾對於上圖這些燒蝦燒牛舌燒粟米和燒帆立貝基本上係抱住欣賞態度去影下就算,幸好旅行腳團友都係刷得之人,最終都能順利清場,而基爾只能參與食埋個綠茶雪糕就鳴金收兵。



甜品類其實仲有芝麻雪糕、柚子雪葩和明月卷,好少日式放題會提拱咁多選擇,多數只係求其送個雪米滋就算數,所以總括而言喱間浪人真係唔錯,絕對可以encore再來試埋其餘幾款緣慳一面的菜式!

浪人日本料理 Ronin Japanese Cuisine
灣仔駱克道181號京城大廈商場2樓

57 則留言:

  1. 呢度我識去呢, 因為以前會去東園金閣飲茶 ^^

    回覆刪除
  2. 好多都限時,真係食得好趕,無時間限制,可以慢慢食,真好介紹﹗

    回覆刪除
    回覆
    1. 喱間可能偏僻D冇咁旺場所以不設時限,都几啱gathering!

      刪除
  3. 食物很豐富!
    但我對日式放題,印象麻麻,因為實在坐得擠,又吵,而且限時限候.......

    回覆刪除
  4. 不限時真係好少見,見到食物質素唔錯,起碼無漏單樣樣都好精神
    果然好介紹呀^^

    回覆刪除
    回覆
    1. 係呀主要係貪佢冇時限,可以慢食慢傾成晚都冇問題!

      刪除
  5. 不設時限。今時今日真係很難得!

    回覆刪除
    回覆
    1. 都係呀!依家旺區好多限時个半至2个鈡!

      刪除
  6. 放題設時限我麻麻,太趕太大壓力啦

    回覆刪除
  7. 食物款式都幾多喎 , 不限時間抵食 !
    中秋節快樂 !

    回覆刪除
    回覆
    1. 你同相公出開灣仔行街都不妨試下!
      中秋節快樂!有冇去睇show?^^

      刪除
  8. 回覆
    1. 都Ok呀!選擇頗多,生熟都有^^
      中秋節快樂!!

      刪除
  9. 啲刺身幾得下喎!~正.
    中秋快樂~假期玩得開心.

    回覆刪除
    回覆
    1. 都唔錯㗎,菜式選擇幾多!
      中秋節快樂!有冇去露營賞月?^^

      刪除
  10. 食探,快樂中秋節。。kaka..

    回覆刪除
  11. 其實因為要傾計所以先要多D時間,香港就是租金貴,維持唔到。

    回覆刪除
    回覆
    1. 係呀旺區通常一晚要做幾輪客先圍得起本

      刪除
  12. 中秋節追月快樂^^
    食物看來不錯.

    回覆刪除
  13. 真喺幾豐富,
    值得一去,
    我亦唔熟灣仔區。

    回覆刪除
  14. 在香港 三百幾蚊/位 食日本餐,仲要係無限時放題,算好抵。
    但可惜我無好生野兼唔係大食,呢度睇怕同我無緣 :P
    祝中秋快樂!食多幾粒月餅喇 :D

    回覆刪除
    回覆
    1. 當係去食buffet囉^^
      如果唔食刺食類,都有好多其他熟食類選擇的....
      中秋節快樂,今年有冇返鄉下同家人過節?
      月餅唔敢食太多了,年紀大丫嘛:P

      刪除
  15. 無限時真係正bor~
    可以慢慢傾慢慢食,貴小小都值得~
    旅行blog寫晒就快去再去旅行啦~
    中秋節快樂~

    回覆刪除
    回覆
    1. 可以慢食慢傾,幾盞^^
      係呀,坐得耐D,傾到餓返少少又可以再食多輪囉wakakakaka.....
      唔知係咪人老咗,依家感覺上好似好懶去旅行XXXD
      中秋節快樂~~~~有冇plan去邊度三日兩夜過國慶節?

      刪除
  16. 呢餐放題都好豐富喎!!!

    回覆刪除
    回覆
    1. 不過好似唔太乎合森兄個健康飲食原則喎:P

      刪除
  17. 有班旅行鐵腳,特別開心。
    食物賣相也頗靚囉。

    回覆刪除
  18. 很多美味食品呢! 祝中秋快樂!

    回覆刪除
  19. 個沙律已經令人流口水,咁你係乜野精?現正在花蓮,與杜娟妺擦身而過!

    回覆刪除
    回覆
    1. 唔錯呀個沙律,好味!!
      算唔算係blog精XXXD
      天氣應該好返D吧,你好彩啦佢走咗你先去,有冇靚相睇下先?!!^^

      刪除
  20. 好開心喎!啲食物都好豐富!

    回覆刪除
    回覆
    1. 如果去開果邊行邊,都不妨一試呢^^

      刪除
  21. 好丰富又精緻的放題歺啊 ~

    回覆刪除
  22. 睇相都覺得賣相算唔錯, 亦夠足料, 唔係件件是但求其咁上枱.
    我如果有大圍聚餐, 都要諗諗去你呢間

    回覆刪除