2013年4月10日 星期三

鯉魚門漁港燈塔@油塘

踏入4月後,大部份日子不是下雨就是陰天潮濕,這天久遺了的春光乍現,當然要出外走走來次東九龍速遊。



真的好耐無見過咁靚的春日陽光,似乎將所有的梅雨濕氣都驅散了,林蔭大道上一片新綠氣象……春天早已來到,夏天還會遠嗎?這次速遊的目的地是一處「老地方」,當然近10年這裏發生了天翻地覆的變化後,早已經是「物非人非」,昔日的老式7、8層公屋、小公園和大排檔、街市早已灰飛煙滅成為回憶,換上的是全新的大型商場和40、50幾層高的摩天住宅。



搭地鐵來到先去逛逛從未來過的「大本型」食野,food court位於商場的頂樓,地方都幾大,也可能是因為商場開幕只大半年左右,來襯熱鬧的人也算多!



都有一排無食過八方雲集的鍋貼和餃子,又試試佢同外面市區的店有無分別吧!不過可能太耐無幫襯過,感覺上依家成30、40蚊一個餐都幾貴,唔算抵食,叫來的「大腸麵線」更加係基爾最怕的東西!



相比起其他市區的大商場,大本型不算大,格局有點似apm,店舖走中檔路線,名店就不多……Anyway,基爾這次來都唔係為左shopping,所以都沒花太多時間逛店,反而商場的平台花園更吸引基爾,由這裏可以睇晒成個油塘避風塘、碼頭和東隧入口的靚景。如果天氣好一點更佳,可以望到去對面海的鯽魚涌西灣河一帶港島東區的海岸線,連中西區和紅磡灣一帶也清晰可見,唔知睇唔睇到維港放煙花呢?!



睇完風景行返入商場逛多陣,其中喱間模型玩具舖都幾吸引基爾,這個熊仔figure與大本型門口的大鐵人雕塑有異工同曲之妙。



上面喱個幪面超人的飛腳姿勢又幾型喎!



見天色又開始轉暗,都係拿拿林起程出外面逛逛。睇地圖沿住鯉魚門道行返出海傍,穿過三家村海鮮市場的攤檔就可以一直走到去鯉魚門燈塔,聽聞那邊風景好正,一於行過去睇下,途中經過了喱間有半世紀歷史的天主教幼稚園。



三家村這一帶的海鮮檔好出名但價錢偏貴,加上基爾晏晝在大本型已經食飽,晚飯又無咁早食,所以只係齋睇無幫襯,不過喱度遊人明顯無西貢咁多,所以都幾好行,途中仲同喱隻長腳巨蟹say Hi!



海鮮市場裏面除了海鮮檔之外仲開左好多酒樓食肆,店舖民居非常密集,窄巷迂迴曲節,如果走入橫巷分分鐘會迷路都未定。行了一半穿過籃球場之後景觀豁然開朗,原來已經到左海傍地帶。



喱度有間海濱學校,唔知仲有無學生架呢?翻查資料原來這間創辦於1946年的村校,於2008年已經停辦了。如果校舍改建為青年旅舍就正了,因為個view真係一流。



行到盡頭終於見到鯉魚門燈塔,燈塔就建在一個凸出海岸的沙嘴上,對面就是筲箕灣阿公岩,左邊可以望到杏花村,右面就是全維港景,極目望過去感覺有點似漂浮在維港海面中心一樣,so amazing!



燈塔個景觀咁靚,相信都會吸引唔少情侶來這裏「海誓山盟」吧!



如果天氣好的時候可以望到中環的ifc和尖沙嘴的icc遙遙相對,喱日雖然天氣麻麻,但依然有唔少釣魚翁來到礁石上釣魚,其實都幾大浪架!



大埔林村有許願樹,如果唔想去咁遠,其實鯉魚門這裏也有棵心願樹,仲要係真樹來的,樹的周圍掛滿了紅絲帶和紅繩……



再向前行無幾耐就到了天后廟,這裏有好多奇石,石上還有紅色的書法題字,有點似去了大陸「天涯海角」一類的景點。



喱舊石上寫了「海角潮音」4個字,莫非在這裏聽海浪泊岸聲特別感受到surround sound效果?



除了奇石之外,天后廟門外仲有兩尊古炮。天后廟建於清朝乾隆十八年(1753年),由當時盤踞鯉魚門海域的海盜鄭連昌建成,鄭連昌是明朝鄭成功部將鄭建的孫。



行行下又開始落雨,就沿路返去油塘大本型吧!路上見到有唔少向海的村屋,住喱度日日對住個靚海景都幾爽,不過唔知潮唔潮濕呢?打十號風球時又會唔會有巨浪湧上來呢?



返到大本型又去food court打躉,這次去幫襯小南洋食個tea。Food court裏面原來有部古董留聲機,到抵仲work唔work就唔知,不過個大喇叭就幾靚,同旁邊的古董梳化好襯!



小南洋$21就有個下午茶餐,叫了士多啤梨和花生醬多士,加$8可配蘆薈青檸汁,再加$10仲有滷水豆腐加半隻蛋,加加埋埋都成$68,幸好個環境都幾好坐。



夜晚黑去到稻香食飯,除左一蚊雞之外喱排仲有「孖寶」,$99有燒味拼盤和糖醋魚,再叫多個孜然豬仔脾,已經係好豐富的一餐了,就這樣過了很滿足的一天!

沒有留言:

張貼留言