紅星餐廳@北角

街市對面路口轉角位以前有間萬寧，不過早幾個月可能因為加租而關門大吉，經過幾個月「內部裝修」之後最近終於重開，不過唔係開屈臣氏或莎莎卓悅，而是一間甚有「貴氣」的西餐廳。

睇下餐廳入面一個角落的裝修陳設，真係有少少五星酒店西餐廳的情調，食完唔知荷包會唔會尺尺痛呢？一場黎到唔理咁多……



Set Dinner由A至J一共有成10款咁多選擇，價錢亦由$68的拿破崙意粉到$198的鐵板T骨牛扒都有，真可以話係豐儉由人悉隨尊便了。



Order好之後，等食的時間除左傾偈之外，又影下餐廳四周圍的環境。雖然係7點幾鐘的晚飯時段，但餐廳內都係只有三四台客，所以基爾求其影幾張相都唔會打擾其他人吧！



基爾唔太食牛，所以都唔會叫最貴的牛扒，就叫了上圖右喱個烤皇帝蝦配Risotto，在menu中只屬中價（$108）。Btw，餐湯是很濃的青豆湯，配熱辣辣的牛油餐飽，正！



友人叫了鐵板T骨牛扒，牛扒淋上了燒汁，配菜還有時蔬、洋蔥圈和薯條。



餐茶有咩選擇呢？除了一般奶茶咖啡檸茶之外，基爾叫了喱杯Fruit Punch，第一次見Fruit Punch用這款保暖鋼杯裝，又真係幾夠凍喎！咁到底埋單時荷包有無尺尺痛呢？梗係無啦因為有人請嘛……

 

紅星餐廳 Red Star Restaurant & Pub
北角健康村2期UG10號鋪