2012年9月9日 星期日

科學園小白鷺半日迆@馬料水

經過上次測試似乎大家對「speed dating」好有興趣,既然收視唔錯就再來多個第二部曲先!



喱個星期日晨咁早畀基爾媽摷醒,話去一個好偏僻的地方飲茶,究竟係咩酒樓咁神秘呢?Anyway,真係好耐無試過星期日要7點幾起身囉!



好彩有人車埋去,可以在車上瞌一瞌,不過其實無耐就去到,星期日朝早喱度可能靜過尖沙嘴,人影唔多隻。最搞笑係去到茶樓竟然仲未開門,真係咁大個仔第1次!



從玻璃門外影下間尚未開門的茶樓先,無呃大家真係連燈都未開架!不過近門口喱個玻璃杯架又真係幾靚,D酒杯掛晒上去就好似一盞水晶燈。



基爾當然唔會咁戇居企係度等茶樓開門啦,都係出去行個圈先再返來吧!反正之前都未來過,喱度雖則叫做科學園,但不論室內室外都幾綠化的。



一路行返出去海邊單車徑,沿途依然係無見過任何人,真係可以拍返套由基爾領銜演出的《新28日後》。



出到去單車徑,風景真係超靚,270度無敵吐露港景加上碧海藍天,求其用手機影都可以做wallpaper。



再睇喱邊可以見到一海之隔的馬鞍山,個馬鞍仲匿埋在白雲裏。可能由於時間實在太早,相信來踩單車的都好少踩到黎科學園,最多都只係入到大圍租緊車吧!



行返入科學園,喱架金色宇宙飛船應該好多人都影過。另一邊的大噴泉也未開,如果開左都會有返多少少生氣。



這艘金色宇宙飛船就成為《新28日後》的主要場景!唔知女主角邊個會有興趣做下呢?



都係唔好癲喇,行返入去室內睇到有個關於中大前校長高錕教授的展覽,由少年到成為諾貝爾物理學獎得主的人生經歷都有簡單介紹。隔籬喱間意大利餐廳聽聞係貴野,當然又係未開。



喱間基爾就食得起,lunch buffet最抵食,恒生卡仲有折,諗得過!清潔阿姐正在裏面拖地,所以只在門口八卦下就走了。



返到茶樓終於開晒燈,門口喱個巨型版iphone都開著埋menu,幾過癮,可惜個touch screen係假的,摸佢都無反應。



等得太耐有少少肚餓,點心多數係掛住食唔掛住影,其中喱味北菇滑雞荷葉飯都唔錯,荷葉味濃一點更佳,照片中大約係食剩五分之一的份量,可知原來有幾巨,價錢好似係六十幾蚊。



熱辣辣的叉燒酥也不錯,有別一般茶樓的三角形,這裏的是長條形,相中係食剩的三分之一條,原本一共有三四條。最後總共食左五六樣野,埋單計齊頭$260,不算抵食!



食完又走去散下步,來到好耐無去的三門仔。



求其用基爾部古董手機影,已經又係另一幅wallpaper。



碼頭仔伸延出海,唔知有無街渡去西貢或者塔門吉澳果D離島呢?不過可能有人會租船出海釣魚的。



好似喱棵龍骨咁,成日企在海邊吹下海風都幾唔錯!



遠處唔知係咪綠茵山莊,見到咁多遊艇船仔其實唔駛講都知喱度一帶都好多有錢人住啦!



好少見碼頭近岸的水質都咁清澈見底,完全係零垃圾。



係咪好想即刻除衫跳落去游下呢?!



第三站去埋小白鷺,搭火車經過喱度成日覺得似古色古香的淺水灣酒店……



雖然已經到了中午時份,但餐廳裏都係無乜人。雖然基爾係白撞無幫襯,一樣可以登堂入室任影唔嬲無畀人趕走。



湖中小屋聽說是間情侶廳,每次只招待兩人,成個世界彷彿只剩下兩個,夠晒sweet!



一列長長的火車在湖外駛過,驚醒了好夢……原來人間與仙境只是相距這麼近那麼遠。



小白鷺從來都係無車到,之前基爾來BBQ都係要call的士。至於停車場當然又係名車列陣,包括喱架純白林寶堅尼。



黃色喱架林寶堅尼都幾sharp,烈日下型到震!



仲有成排紅卜卜的法拉利都係好求其咁泊係度……鄉下仔基爾真係大開眼界!

4 則留言:

  1. 你今天都去了很多地方呢! 天氣好似唔錯!凍嗎?

    回覆刪除
  2. 這幾處地方環境教唔錯啊!

    回覆刪除
    回覆
    1. Melo:係呀所以好天時都好多人來踩單車

      刪除