2012年1月6日 星期五

珠江酒家@太子

唔知點解最近次次食親都係舊式中菜館,繼上次深水涉的中央飯店之後,今次又揀了太子的珠江酒家,同樣地道,菜式懷舊!



睇上面間酒家門面感覺上有五、六十年代feel,好明顯係老字號,屹立咁多年梗有其本事吧!入到去友人已到了,見牆上貼滿菜單,果然全屬好地道的古老菜式。上圖右是其中一款蘿蔔蝴蝶腩煲,雖然基爾不太食牛(所以食了不少蘿蔔),但都覺得幾好味!天寒地凍尤其滋味,正!



豆豉鯪魚油麥菜都算係古老菜式,豆豉鯪魚依家一罐都要成十幾蚊,所以喱碟有咁大碟都算抵食,不過始終略嫌太油膩,基爾都係「淺嚐即止」。



喱味金沙黃金墨魚粒係喱間老店的招牌菜之一,味道確實係幾唔錯,無一般椒鹽鮮尤咁鹹咁油之餘,包在表面上的鹹蛋王漿炸出來都好夠鬆化,外鬆內軟的口感幾特別。唯一問題係基爾年紀大,驚膽固醇超標,亦都係「淺嘗即止」。



爽蠔係另一味招牌菜,這味更加特別,大鄉里基爾之前都無食過,一啖一隻確實係幾爽,如果用黎送啤酒應該幾正!可惜之前基爾病過黎,都係唔敢食太多蠔,所以同樣係「淺嘗即止」。



好喇!來到最後一味同屬老牌菜式鵝腸。依家其實好多食店都不再做這味懷舊菜了,因為製作過程實在太煩,煮出來友人就覺得水準幾唔錯,腸裏還有很多肥膏云云……基爾其實齋聽都打冷震,勉強食半條都係「淺嘗即止」,最後交由友人收拾殘局算了!

p.s. 今餐專登借用了友人的新寵Ricoh GXR來拍照,反正基爾志不在食,比較得閒,就肩負起影相重任,不過實在唔太識用佢個定焦鏡,友人看後取笑照片out-fo的居多,但其實都唔係丫,都見得下人吧!
 
珠江酒家
太子荔枝角道138號地下

4 則留言:

  1. Gael,好介紹,老式酒家才有好食的懷舊菜吃.

    回覆刪除
    回覆
    1. Andrew: 喱類懷舊菜都幾花心機整, 好多食店依家都唔再整了

      刪除
  2. 以前因公關係,同個老闆都幾熟. 唔知佢e+仲有冇做.

    回覆刪除