2011年5月2日 星期一

雲遊ICC迆食個tea@西九

基爾向來有少少畏高,外遊時去親D咩觀光電視塔又或者摩天大廈觀景台之類的都會有少少腳軟,大多都敬而遠之。喱次唔怕死膽粗粗走去ICC,就係希望以毒攻毒克服畏高!


每次去親Elements都覺得好鬼隔涉 / Ritz Carlton位於Elements的入口

不過友人話如果畀百幾蚊上去ICC新開果個Sky100(天際100觀景台),就咁行一圈驚會有少少無聊,咁不如就去埋有得食野的地方啦!


Ritz Carlton的獅子標誌 / 底層的酒店大堂都幾富麗堂皇 / 有SCMP睇

睇開「永樂大典」的blog友一定知基爾平時深居簡出生活儉樸,好少去喱種高貴名店,即管去見識下。結果去到Elements問左幾次商場姐姐才識上去Ritz Carlton,嘩!個大堂幾靚,5星即係5星!聽聞周六、日喱道打晒蛇餅。


位於103樓的Chocolate Library,可以望到下面果間好高貴的意大利餐廳Tosca

究竟乜咁巴閉打晒蛇餅,咪就係去喱間Chocolate Library囉!喱間「圖書館」巴閉在比Sky100還要高3層,位於103樓Ritz Carlton的lobby旁邊。


梗係拿拿林霸返個無敵大窗口位啦 / Chocolate Library的menu

搭電梯由地下大堂直上到103樓lobby只係大約1分鐘左右,飛越103層時,耳仔都係有少少不適。由於黎到時才不過晏晝點零鐘,無乜人,正呀!霸返個大窗口位先,慢慢揭住menu再望望身邊個「萬丈懸崖」,好彩畏高症無乜發作。


望落下面就係佐敦道一帶 / menu中果然有好多朱古力甜品

不過由於喱日天色麻麻地,仲有少少雨,所以只能影到煙雨瀰漫的雲海景,藍天白雲就欠奉了,靚仔相機也要投降!


由於tea time有排未到,影下「圖書館」的刀刀叉叉同餐巾先

雖然無藍天白雲,但睇雲海其實都幾過癮,畢竟香港唔係黃山,冇咁多地方睇到雲海,而且仲要係在市區,唔駛山長水遠上鳳凰山喎!只需他他條條安坐冷氣開放的餐廳內就睇到,超正!


先來個朱古力火鍋 $100 / 棉花糖

由於只是點零兩點鐘,有排未到tea time,餐廳裏又侍應多過客人,如果齋睇雲海同影相搞搞震,又好似有D核突,於是就先叫樣野食下無咁礙眼。來Chocolate Library都係想試朱古力甜品,就叫個朱古力火鍋,貪佢可以hea住食!


原味、士多啤梨味和朱古力味小蛋糕

事實證明叫朱古力火鍋係明智之舉,一來可以慢慢搞、hea住hea住咁食,食下又可以傾下偈,無聊時又影下外面的雲海風景。雖然用來點朱古力漿的蛋糕仔細到唔夠攝牙罅,但其實醉翁之意也不在酒吧!


窗外的雲海有聚有散,下面可能落緊雨 / 另一邊廂的中菜廳「天龍軒」有盞超豪大吊燈

最好彩係靚女waitress姐姐睇見基爾個貓樣都知唔似係咩太子爺,係黎hea坐居多,竟有棉花糖源源供應,不至於一陣風咁就食晒個朱古力火鍋。


睇住雲海在下面由東飄向西,忽晴又忽雨,很少機會由這個角度看煙雨濛濛的香港

Hea坐左成個鐘之後,見朱古力火鍋又食到咁上下,於是就叫了那個好多人打蛇餅等住食的Tea set了!


喱座就係有少少似中式古董擺設木架的Tea set

不過估唔到係,原來個朱古力火鍋睇落雖然咁少野,但食完後才發覺其實都幾飽(可能食得太多棉花糖)!再細問waiter哥哥,發現佢地個著名排長龍Tea set係有「一人前」同「兩人前」的選擇,就叫「一人前」吧!


Tea set古董小盒子裏裝滿了cheese cake、三文魚小餐包和各式朱古力蛋糕仔

其實「兩人前」同「一人前」的分別是每種糕點多一份,「一人前」的甜品種類不會少了,反正有點飽就叫「一人前」(仲平少少,只需二百幾)。


甜點上的生果都好新鮮,賣相非常的骰別緻,似玩煮飯仔

至於個Tea set抵唔抵食同好唔好食就見人見智各有偏好吧!但甜品的種類算是幾多的,每樣都係細細地咁一件,都係貪得意居多。


Chocolate Library的格局陳設都優雅,座位也坐得舒服,hea坐傾偈一流 / 熱朱古力

不過靚女waitress姐姐拎住個Tea set盒子來時,確係幾有氣勢,成個邦女郎咁!打開前仲會先提提你影下相先,盒子打開後又會逐一仔細介紹每樣甜品係咩,可惜D英文名好深,基本上聽完都唔記得晒。


返回Chocolate Library地下大堂,見有架Rolls-Royce喎,係咪車D貴賓架呢?

食飽hea飽兼睇飽個無敵天空之城靚景後,見已經成4點幾,埋單後就由103樓的「天堂」搭電梯返去地下大堂的「凡間」了……其實,間中做下神仙都唔錯呢!

沒有留言:

張貼留言