2011年3月16日 星期三

潮州村@天后

近排米G蓮巧合地出巡親都係巡去食潮菜,繼早前去完阿鴻小吃同潮客後,喱次又去到天后銀幕街的老字號潮州村。雖然成日食潮菜,但奇就奇在每次都有驚喜,開心過食出奇蛋!


電車(Hong Kong Tramways)又平又舒適又環保又方便,以後要坐多D

由於時間相當充裕,基爾這次選擇串演電車男赴會,發現放工繁忙時間搭電車出天后,原來比坐巴士或地鐵還要快趣和舒服,一來係因為電車有專線行,其他行車線都比較塞;二來街邊隨處都有站,唔駛行去地鐵站又要貢上貢落費時失事(港島區的地鐵站一般都非常深);三來又有位坐;四來又超平……以後如果係搭短途的,都一定會選擇悠遊電車河。


潮州村(Chiu Chow Chuen)6大名菜……的菜單

好喇,同電車公司賣完廣告,都係時候轉返入正題!究竟今次第3次食潮菜仲有咩驚喜呢?揭盅之前,先畀樣野大家玩下,請先看看上面的菜單,這次總共叫了6味,基爾相信如果能正確嗡得出當中4味或以上的,已經可以畀個「distinction」你,若嗡得出3味應有個「credit」,估中1味也有個「pass」。就畀10秒大家估……警告!咪出貓睇下面D相,否則即時disqualified你!


「猜猜我係乜」冇獎問答遊戲

10、9、8、7、6、5、4、3、2、1……Time's Up!Pens Down!夷……咦!大家的成績睇黎都唔多好喎!即刻就來「放榜」,由上至下﹕1)「蚝并」即蠔餅,正式名稱係香煎蠔仔烙,這個是最易估中的了;2)「干」即鵝肝,正名係滷水鵝肝;3)「片+勿」即滷水鵝片併墨魚;4)「沙牛蘭」即沙爹牛肉片炒芥蘭;5)「唐丐」即糖醋麵;6)「雙早各4」即雙棗各4粒的併盤,所謂雙棗即炸蟹丸和炸蝦丸……好喇咪笑住先,到抵有冇人「食光蛋」全部估錯晒呢?!


滷水鵝肝(Marinated Goose Liver) / 滷水鵝片併墨魚(Sliced Goose Meat & Cuttlefish)

見大家口水已經流晒出黎浸晒我個「永樂大典」,都係拿拿林post食物相,否則驚會暴動!先上台的兩味係該店馳名的潮州滷水鵝肝及滷水鵝片併墨魚。基爾實在大鄉里,今次係第一次食潮州滷水鵝肝,口感細膩嫩滑得來又夠香軟,入口即溶如吃山水豆腐花,直情媲美法國鵝肝,正到呢……難以形容,唔怪得係鎮店名菜!至於滷水鵝片併墨魚對比上次食的「潮客」就稍遜,但水準仍屬中上。


香煎蠔仔烙(Oyster Omelette) / 糖醋麵(Sugar & Vinegar Noodles)

另外仲叫了上面兩味「炸物」,蠔仔餅有成個大pizza咁大,而且外脆內軟,一啖咬落去即刻標晒D蠔汁出黎,好正!不過基爾因身體問題唔敢食太多蠔,所以只限自己食半角就忍口收手。再說糖醋麵,由於本來想叫反沙芋,但已賣晒(另一味想叫的鵝腸也售罄,真搶手),唯有叫喱味甜品,其實它也是很出名的潮式甜品,麵餅炸得脆卜卜,撈上白沙糖同鎮江醋就食得,味道酸酸甜甜幾有趣!


碟碟清倉 / 飯後飲一啖清香的烏龍茶(Oolong Tea),生津消滯

同場仲叫了炸雙棗和沙爹牛肉炒芥蘭,前者是老闆娘推介,但可惜不算特別好食,後者沙嗲芡汁太杰太厚,是水準之下,可以不試!本來友人想叫另一潮州名菜凍烏頭,但基爾怕腥及多骨,所以作罷!食飽飽之後再來一盞烏龍香茗,確係雙得益彰……簡單而滿足的一餐也只是$130 per head,算係幾抵食!


畢特(Nicky Butt)個肚腩都幾大喎

席間除左傾偈之外,仲睇下友人相機中的照片,因為飯前他去了大球場睇波,雖然南華最後以0:1輸畀大埔,但據聞有幾千人入場,氣氛唔錯。當然基爾主力係拜託佢去影下新加盟的畢特同基士文的靚相。照片中的基士文仲算fit,但畢特就明顯有個小肚腩,咁睇黎同期的碧咸算係咁啦,一把年紀仲可以去拍CK廣告。睇黎畢特都要勤力D加操幾課,唔打得都要睇得架嘛,話晒係前紅魔喎!
 
潮州村 Chiu Chow Chuen
天后銀幕街16號地庫

沒有留言:

張貼留言