2011年1月6日 星期四

寶蓮素食@荃灣

上次去完圓玄學院其實仲有下文,就係去食齋!其實本來圓玄學院上面都有得食齋,不過價錢較貴,還是落左山先再搵食吧!


寶蓮素食 / 齋碗仔翅 / 粟米粥

位於眾安街的寶蓮素食閒日下午$38任食,加埋茶錢加一都係50蚊有找,想平平地食餐齋也是不錯之選!餐牌上有廿幾卅種菜式任叫任選,基本上所有嗡得出的齋菜也包羅盡有,上圖是其中兩味常見的齋碗仔翅和粟米粥,算好食!


基爾自少的至愛芋頭魚 / 炸齋雲吞

再來這味是基爾由細到大都咁鍾意食的芋頭魚,炸得外脆內軟非常好味,而且這裏是任食的,魚的size比較細,一人一條剛剛好。另一樣必食熱氣野就係炸齋雲吞,醮上甜酸醬一流,好食過薯片。


齋鱔糊和齋鮑菇 / 酥炸蜜瓜球

除左食炸野之外,當然仲叫了幾味特色小菜,不過基爾掛住食好多都唔記得影,其中上面那味齋鱔糊幾特別(雖然都係差唔多食晒先影),所謂的鱔其實是一卷小腐竹,外面包了一層紫菜,就像鱔的魚皮,又有少少腥腥地的味道,連平時唔太鍾意食炒鱔糊的基爾也覺得好食。另外一定要post的仲有上面圓碌碌的蜜瓜球,裏面真係有蜜瓜蓉的,而且很有蜜瓜的香味,超正!


紅豆砵仔糕 / 西米紅豆角

仲有喱兩樣甜品都唔錯,分別是紅豆砵仔糕和西米紅豆角。其實同場仲食左馬豆糕、西米糕和椰汁糕,不過掛住食都唔得閒影喇!食完成籮甜品之後真係飽到上頸……最後值得一提的是,由於店裏的侍應不多,人多時都要等幾耐,尤其係炸物,原來係廚師即叫即炸的,非常新鮮,但當然也須等耐一點!


粗菜館 / 酥炸魚頭允 / 蜆介鯪魚球 / 川辣鴛鴦雞 / 炒豬雜

食完齋之後,再坐巴士遊下車河先。由荃灣坐40號巴士,經過好耐都無去的大窩口、葵涌、荔景、美孚,穿過長沙灣的工廠區,還有石硤尾、白田、大坑東一帶的老牌公屋區(終於知道美荷樓在哪裏),最後hea到去九龍城。山長水遠來到九龍城搞咩?當然又係為食,幫襯了上面這間粗菜館,店內見有蘇絲黃大大隻字寫的「必食炒豬雜」,所以也叫來一試,但唔算太特別。另外還叫了幾味,例如川辣鴛鴦雞(雞和田雞),但普遍都偏辣和味濃。當中基爾較喜歡的只有蜆介鯪魚球,聽聞蜆介還將會「絕種」,真係要點多兩啖先得!


古老的國際戲院遺址聳立在衙前圍道上

食飽後再四圍行下散散步,沿衙前圍道一直走,街的兩旁仲有唔少古老唐樓,但間中已見到有不少拔地而起、高四五十層的新式豪宅大廈,感覺上與成個老社區格格不入,但都無辦法,香港就是這樣吧!無耐見到上圖這間3層高的老洋房,聽說是昔日的國際戲院,底層地鋪仍有「國際」兩個大字,樓上則有幾個雅緻的小洋台,未知港府又會否收購下來活化呢?
 
寶蓮素食@荃灣
荃灣眾安街81號

沒有留言:

張貼留言