2010年9月5日 星期日

百年旗袍變奏@歷史博物館

最近香港歷史博物館有個旗袍展,不過應該唔係太多人會留意,畢竟逛博物館總令人聯想到個「悶」字。然而喱個展覽有少少特別之處,就係除左可以從旗袍看歷史外,仲可以見到旗袍design從清朝至今的百年演變……



在眾多展品當中,還有幾件是名人穿過的,包括蕭芳芳去年在電影金像獎接受「終身成就獎」的那襲藍色旗袍;朱玲玲選港姐時穿的淺藍旗袍;還有仙姐、林黛的經典旗袍;值得一讚的仲有2008年北京奧運禮儀小姐的新派大紅旗袍。可惜場內不能拍照,所以唯有影下張場刊比大家望望!



另一樣抵讚的是,睇展覽之餘仲有紀念品送,就係上圖喱兩個紙雕,背景分別是拍攝自博物館內常設展館「香港故事」裏面的茶樓及電車,此外還有一個紙公仔做model,可以分別換上20、30年代至50、60年代的4件紙旗袍,都幾過癮!



若記性好的blog友可能仲記得之前基爾砌過一個台中車站的紙雕(詳見﹕風從寶島來@前傳),相對來說喱個簡直係easy job零難度,三兩下手腳就搞掂。雖然影唔到展覽場內的真野畀大家睇,姑且影下喱個紙model擺幾個鋪士補數……



玩完旗袍model公仔之後,點都要交代一下個展覽吧!翻查資料喱次大型的旗袍展,原來展出了280多件旗袍。旗袍的歷史可追溯至清朝,最初屬滿族的裝束,然而經歷幾百年滿漢文化的融和,逐漸又滲進了漢服的特式和傳統刺繡的細節,民國以後旗袍還成為國家禮服之一。



30-50年代原來是旗袍的全盛期,不少名媛淑女名伶影星都會以一襲設計及剪裁優美的旗袍出席大場面,只有這樣才能展現出東方女性的體態美,所以時至今日不少選美比賽仍會保留旗袍這個傳統環節,也是東方選美活動的一大特色。

p.s.睇睇下旗袍做乜又拎張火車飛出黎咁九唔搭八?無錯,因為喱日發現原來買單程飛出紅磡竟然係平過嘟八達窿,雖然只係一個幾毫,不過因為實在太耐無試過買飛,就去部售票機度搞下玩下。可能由於大部分人依家都係只會嘟八達窿,所以買飛的人真係唔多,售票機變左好多時只係為自由行而設,完全毋須排隊,既方便又先進。話時話自從有左八達窿之後,基爾就無買過單程飛或者儲值飛,依家都應該已經無儲值飛賣了吧!記得以前讀書時會儲埋D尾程優惠飛用黎搭過海,非常慳家!至於依家喱張單程飛,雖然仲係一張磁卡仔,但上面的圖案設計早已不同了,手繪的香港skyline同地鐵站其實都幾靚,不過背面就再無以前那些廣告或地鐵路線圖了!

沒有留言:

張貼留言