Ruby Tuesday@九龍灣

上次食完米芝蓮一星的中式點心店，今次換換口味去試下美式餐廳Ruby Tuesday，因為有friend有五折卡，就即管去試試。事前基爾也不懶，上去open rice做定功課，睇睇人地有乜推介，並mark低三、四款必食之選，心諗應該無死喇卦！結果係~~~~

Jumbo Lump Crab Cake $118 / New Orleans Seafood $218

由於係周五晚的關係，為免要久等，同行友人已預早book左位。基爾收工較夜，但亦以極速趕去會合，不過去到其實都唔算太多人，絕對係可以hea食幾個鐘的地方。坐低打開個menu睇睇，其實傳統美式餐廳都不外乎食burger同埋大塊大塊扒之類的，anyway~~立即已鎖定之前在open rice睇過的幾道「招牌」菜式，咁多人話正，相信唔會咋得去邊卦！另外還order了上面的珍寶蟹餅同埋新奧爾良海鮮飯。個蟹餅其實一 D都唔珍寶，面積僅約一個茶杯碟咁大，未試真D味已經食晒！感覺上無乜味。至於海鮮飯基本上係一條龍利柳加幾隻蝦、西蘭花同車喱茄，無乜特別，飯身偏硬，屬鬼佬口味，通常佢地較愛食硬飯！大家睇到上面個價錢唔駛「嘩！」一聲，我係無打錯架，所以個人就覺得唔係太抵！


Colossal Burger $160

再食上面喱個招牌菜Colosal burger，因為見人地勁讚，當然要試一試。個飽其實都幾大個，塊牛肉亦幾juicy幾厚，唯一要挑剔的係唔夠芥醬。此外，落order時其實可以先叫廚房砌好再上台，不過我想感受下切大飽的滋味，同埋又要影下相呢~~~所以就決定原個上。不過原來個飽都幾鬼難切，搞到雞手鴨腳咁，下次都係切好先上為妙。餐廳內仲有好耐無見的salad bar。記得細個時去親pizza hut，都鍾意去玩喱種疊羅漢砌沙律玩意，食反而係其次，事實上基爾都唔太鍾意食沙律，不過最享受個過程，同埋疊到成座山咁拎返去畀人讚！依家大部分pizza hut都已經取消左個salad bar，無得再重溫這種鬥砌沙律的滋味。


Ribs（classic barbecue sauce） $258

最後試埋上面喱個燒豬肋骨！但可能因為之前食完果個大burger之後都飽左七成，所以食到喱味時已經幾飽。其實個肋骨本身唔太韌，而且都幾多肉汁，燒出黎亦幾香，但最弊係個BBQ醬汁，似乎太甜太濃，幾乎掩蓋晒肋骨本身的肉味，所以要扣分，結果亦幾乎無乜人吼，要好辛苦咁食埋佢，算係唔好浪費。 原本仲想試埋佢地個招牌甜品Chocolate Tallcake，但都因為太飽（同埋D野實在唔太滿意），所以都無叫到，慳返一舊水！埋單計4樣野都要$754，連埋加一要成$830，都幾貴呀！如果唔係有五折卡，基爾一定食唔起，話晒都唔係咩有錢仔丫嘛！況且論好味程度，頂多只能畀個B grade佢！

 

Ruby Tuesday
九龍灣德福廣場一期P26號舖

添好運點心專門店@旺角

早前聽聞旺角有一間蚊型點心店獲評為米芝蓮一星食店，已經想去試試到底係乜料，但同時也聽聞最少要等位等2粒鐘，心諗﹕唔係咁勁呀嘛！都係等佢熱潮過左先去試下。不過突然友人又話想試試，仲拍心口話去先拎籌等位，基爾當然要老遠轆出城奉陪到底！結果就創出了一個幾驚人的紀錄……

皮薄晶瑩的腸粉 / 甚脆的鹹水角 / 半肥瘦蒸排骨 / 店外盛況

到底係乜野紀錄咁巴閉？當然係等位最長時間紀錄啦！友人在當天朝早開舖後十時多已來拎籌，卻已經排第六十幾，基爾到達時見店外「人馬踏雜」的情景也心知不妙，也作好「持久戰」的心理準備。友人提意先返回波鞋街那邊的「樂園」食碗牛腩麵作早餐，添好運的點心就留待作「午餐」吧！反正也有點肚餓，就依他的策略先去食麵，也可坐下來傾陣偈先，唔駛被迫罰企幾粒鐘咁慘丫！


熱辣辣春卷 / 一口一啖燒賣 / 脹卜卜蝦餃

由於要留肚食點心，在「樂園」只叫了牛筋腩麵同豆槳就算，志在有地方坐坐閒聊下。到了12點左右見店內人客漸多，也不好意思繼續閒坐阻人做生意，就埋單去逛逛CD店，當然又有收穫，買了Sting的新碟（另文再談）。行完又走了去逛附近的樓上書店，發現了一本好「古老」的日本小說《冰點》竟然再版推出，原來是為了紀念作者三浦綾子逝世10周年。相信依家都無乜人會再看《冰點》了吧！基爾回想起看這本小說時，也是初中的年代了！當年曾有一段時間迷上了看日本翻譯小說，川端康城的《古都》、《伊豆舞孃》、《千羽鶴》、《雪國》；後來又看了幾本松本清張的，如《點與線》、《砂之器》等，之後又瘋狂迷上了三島由紀夫和村上春樹，那時還會經常去圖書館借他們的小說來煲！


狹小的店舖 / 手打牛肉球 / 過份鬆散的馬拉糕 / 最值一試的酥皮叉燒包

在書店流連了一會，看看錶已經近1點鐘，友人打電話一問，原來已經到了五十幾籌，於是就打道回點心店。不過來到店門前也足足硬等了逾半粒鐘才有位，入到店內坐低時已近兩點，計起上來也等了差不多4粒鐘，都算係一項幾驚人的紀錄吧！唔理三七二十一立即就剔點心紙，結果3人共掃了上面幾樣。可能由於期望太高的關係，感覺上大部分點心其實都不算特別超級好食，至少唔會好似味王咁好食到彈上天花板，值不值得苦等4粒鐘就真係見仁見智……唯一令基爾叫絕的就是上圖好似一個迷你菠蘿包咁樣的「酥皮叉燒包」，果然係名不虛傳的「鎮店之寶」，確實係必食之選。茶錢每位2蚊算是便宜，加上樓面的姐姐雖然忙得團團轉，難得也笑容滿面，而且斟茶遞水上點心服務也算殷勤，值得一讚。最後埋單計約120元，以這個價錢食到「米芝蓮一星」，都可以叫做抵吧！



後來睇返有關這間食店的報道，原來其老闆兼點心師傅麥先生來頭都唔少野，佢之前曾任職另一間米芝蓮三星食肆「龍景軒」當點心師傅，今年3月趁金融海嘯租金下跌而自立門戶圓當老闆夢，怎知這間小小的點心店竟然打響名堂榮升「星級食府」，果然真係有危就有機！

 

添好運點心專門店 Tim Ho Wan
旺角廣華街2-20號翠園大樓2期地下8號舖

城門河睇划艇賽@沙田

之前山長水遠去西九又去小西灣睇東亞運的開幕同埋足球賽，基爾又怎可以錯過屋企樓下城門河舉行的划艇賽事，話晒係「主場」嘛，點都要去捧一捧場先得！這日雖然要返工，但都特登大清早拎住相機踢住拖鞋走落街睇睇，即管影幾張相畀大家睇下划艇比賽的場面。

城門河邊由於有划艇會又有龍舟會，所以平時周六、日都幾多人黎扒艇，不過比賽就不多見，最多係端午節時來睇龍舟賽吧！喱日原本都想拎埋架單車出動，一路踩一路影多幾張，可以有多一點不同的角度，不過最後都係趕唔切，算啦！其實可以在河邊影幾張，已經幾滿意了！



上圖右方是起點的大橋，平時基爾都會經常踩單車來喱度，跨過城門河後就可以一直踩去CU科學園果邊，再往大埔、汀角甚至上埋船灣大壩都可以，不過喱日就因為舉行東亞運的划艇賽事而暫時封路了。無計啦！就在橋邊望一望都好，從這裏遠望河面，工作人員正忙於為比賽作準備，河中各線路的參賽艇手也ready了。橋上一聲鳴笛，每艘艇都如勁箭般向前疾速而去。



上圖是靠近終點線一方的尾段賽道，表面上睇黎與起點大橋的距離似乎好近，不過其實由起點步行到這裏，也要十多分鐘時間，相信艇手扒到喱度已經幾辛苦架喇！賽事的安排其實不算太頻密，閒來就影下白鷺！可能由於水漲的關係，喱朝早見條河的水質出奇的良好，非常清澈，甚至見到有魚在水裏游來游去，難怪吸引到咁多白鷺來食早餐啦！臨走前當然還要拍多一段比賽片段，好犀利！連對岸觀眾的打氣聲也錄了下來，原來唔只在足球場可以感受到東亞運的比賽氣氛呢！

p.s.再擺埋之前影落有關東亞運的相上來，也甚具紀念價值！

雨中為港足吶喊@小西灣

繼上周末貪得意殺入西九海濱長廊睇東亞運的「開幕大典」後，日前又突然有同事話有東亞運足球賽事飛，基爾當然立即累飯應啦！拎左飛放工就立即以9秒9高速閃去小西灣球場睇波。

其實基爾非特別鍾意睇足球，這次來小西灣睇香港Vs中國，也非抱住睇乜野大戰的心態，老實說也不過是「海軍鬥水兵」吧了！醉翁之意不在酒的基爾只想感受一下東亞運的比賽氣氛，也總算見識過香港辦國際大型運動會的場面，反正不用花錢買飛，所以即使落雨也要來，當然仲要現場直擊畀各位blog友仔睇睇啦！

來到球場時好彩雨稍停了，在南灣半島的小巴總站落車，穿過商場就來到球場。這裏對基爾來說也蠻熟悉的，因為舊公司就在附近，以前也留低唔少腳毛在這裏。拎住飛入場時原來也頗多人啊！真感到有點意外，唔係話東亞運的賽事場面好冷冷清清架咩？！相對於一般本地波周時都係演「神功戲」咁，今次喱場波都算係人氣勁！至於入場前還要排隊搜袋，算是聊勝於無的所謂「安檢」吧！



昔日由於工作關係，基爾有時都有機會「拉衫尾」到大球場、紅館、新伊館或維園網球場睇波，不過來小西灣球場還是首次，感覺上個球場都幾靚幾大。不過由於有跑道，觀眾席距離草地就稍嫌遠左少少，不過都算OK！唉~~~反正唔駛錢，都係唔應該再彈三彈四喇！

雖然見張飛係有劃分乜乜區，不過入到場基本上無乜人會理，都係自由坐，基爾就霸左個「底線位」，因為方便睇入波丫嘛！坐低無幾耐香港及中國隊就齊齊進場，然後仲有升旗唱國歌添，氣氛都唔錯架！同睇電視係唔同D~~



開波之後，雨勢由最初的毛毛雨到後來的綿密細雨，某程度上都影響了球員的發揮，大部分時間雙方都是在中場附近混戰，絕少埋門鏡頭。如果在家睇直播的話，老早就按捺不住轉了台，現場當然又唔會咁衰提早離場啦！反正山長水遠來到，咪當感受下現場氣氛，聽下D球迷嗌下打打氣又爆下粗、一齊開下汽水，又或者影下相拍拍片，不經不覺又過左半場。而上半場唯一有留心睇波的，咪就係24分鐘中國隊前鋒高迪接應角球在混戰中射入果球。

下半場雨勢愈落愈大，兩軍又係繼續中場混戰，那隊水皮中國國奧隊的攻勢也不見得有幾銳利，所以也沒甚看頭，基爾大部分時間都係與同行的friend吹水聚聚舊而已！有球迷嗌時就又嗌兩聲，都幾過癮架！



不過到了賽事末段，港隊突然一輪發力反擊，壓住中國隊係咁砌，正好就在基爾坐位前的禁區一帶，不斷又角球又罰球咁攻門，算係幾肉緊，可惜最後都無功而還，幸而因為喱一連串攻勢，又畀基爾影多幾張相同埋拍多段video畀大家睇下！

最後長雞一鳴90分鐘完場，香港雖然是以0﹕1飲恨，卻仍歷史性取得小組首名出線。雖則話係「讓賽式」的東亞運，但亦總算威返一次，對在場邊吶喊助威的球迷來說算係有交代。希望港隊延續神蹟，在四強贏埋北韓，就有機會在大球場爭金，創造香港足球又一個傳奇！



p.s.12月10日晚港隊於大球場舉行的四強戰，與北韓加時戰足120分鐘仍以1﹕1賽和， 結果互射12碼港隊勝4﹕2（總計勝5﹕3），周六決賽將與日本爭金



p.s.12月12日晚奇蹟真係發生左，香港竟然在決賽贏左日本，仲贏埋個東亞運男足金牌，仲贏埋三萬幾球迷……有無犀利得咁緊要呀！！！1985年5月19日，港隊在世界盃外圍賽戰勝中國取得小組出線權，當年基爾仲未識睇波，不過今次終於可以見港隊另一個歷史的一刻！

感受東亞運開幕氣氛@西九

尋日係香港東亞運舉行開幕禮的日子，本來早已打算去尖沙嘴海傍湊湊熱鬧，畢竟在維港上搞大型開幕禮，又話會有花船又放煙花，似乎也甚具睇頭。不過突然醒起早前舊同事送的兩張電影《心魔》的換票證，此戲因惠英紅贏了金馬獎而重映，但全港只有Elements的The Grand Cinema有得上，所以最後陣地由尖沙嘴移師至西九。

我諗唔會有好多blog友睇過《心魔》喱套戲，因為早前上映時也是只有BC等兩三間戲院做，映期也只有一星期左右，就閃電落畫，這次重映自然不能再錯過睇免費戲的良機。故事其實主要圍繞惠英紅同徐天佑的母子情，說是什麼「奇片」又不算，但結尾就有少少tricky，有興趣的不妨第二時租碟睇，等大家估下徐天佑個女友到底係邊個殺的？基爾就估兇手應該係惠英紅！



睇完戲之後還未到4點，順便走落去溜冰場旁果間HMV逛逛，因為一直好想買Sting的新碟《If on a winter's night ...... 》因為Soul Cake實在太正，可惜見佢開價$99，似乎幾貴，姑且忍一忍手唔買住。4點幾見Elements已經無乜吸引的店舖要行，就索性早一點走出去外面的西九龍海濱長廊探路。



基爾是如假包換的「鄉下仔」，平時除了返工外都很少出市區，而西九海濱長廊也是第一次踏足，不過在Elements行來行去，找了好久才搵到正確的出口，但由商場行去海濱長廊，原來也要走一段很長的路，唔怪得這裏有單車徑，可能踩單車去會輕鬆少少。好不容易來到長廊的入口，眼前竟又是一條沒有盡頭的單車徑~~~嘩！真係好鬼遠喎！幸好路旁已經有不少東亞運吉祥物的擺設，可以影下相，還有不少警察巡來巡去，莫非驚恐怖襲擊！



行了十來分鐘，終於見到「海濱」，原來整個海濱區域都劃了為觀看東亞運開幕禮的專區，兩隻吉祥物東仔同阿妹則忙於與小朋友影相。此外，場內還豎立了幾個大電視，以及一排小食店、救傷站、廁所之類的。不過最吸引基爾的，是由這裏回望ICC、凱旋門那邊的view，都真係幾宏偉！



可能由於距離舉行開幕禮還有大段時間，所以遊人也不太多，就連楝起腳架霸位的拍友也不太多，相信比尖東那邊清靜。難得賽會請了雜技人在場搞搞氣氛，於是替這位特登為基爾擺晒鋪士的「踩高橋魔盜王」影影相先！



由於西九海濱長廊這裏四野無遮無擋，連樹也不太多，大部分地坊都係荒草一片，而且風勢甚大，企企下也有點凍，為免冷親還是先撤退回Elements，不過臨走前還是先拍下迷人的黃昏日落照，原來在這裏影「鹹蛋黃」也不錯呢！



回到Elements後，個肚竟然開始有少少打鼓，但環顧商場內沒什麼特別野想食，而且也素知這裏的食店偏貴，所以還是走遠一點，返回佐敦、油麻地一帶覓食。唯一遺憾的，就是要放棄回去海濱長廊那邊影花船同煙花了！算啦，還是食緊要一點。由於好耐無食過拉麵，結果走了去食味千拉麵，叫了上圖的相撲拉麵，份量大但不算特別好食。此外，還叫了特價$20一客的炸雞，只能給予四字評語﹕「太乾，難食！」比較特別的是圖左的sparkling juice，$20左右兩支，初頭都有點驚會好果汁汽水，不過飲落反而有少少驚喜，原來也不太甜，基爾飲的那支red grape juice果然係幾有真提子汁feel的，算是為這餐爭回不少分數。



順帶一提，以往基爾極少會去Elements，因為家中無巴士直達，最近也要在彌敦道落車，然後行晒成條佐敦道咁moon walk入去。今次也是港鐵環九龍線開通後，首次坐火車去柯士甸站，發現這個站就好似死城一樣，人流少之餘，大部分店鋪也是空置的，而且距離九龍站也非常近，不明白港府為何要花錢另建柯士甸站？算了吧，政府不嬲都會做好多令人費解的東西！

回到家後，再拎返上圖這個東亞運首日封出來欣賞下，因為今朝難得早起，就趕快落街去郵局買，由於係鄉下地方，幾乎沒有人排隊，實在太好了！諗返早前去排隊買國慶六十周年果個首日封，簡直想死！這次當然諗都唔駛諗，用左$1買個封及$13.6買張小存張貼上去，chop埋個東亞運動會的印就搞掂晒！封日首影出來可能不太特別，只是各種比賽項目的運動員剪影而已，但其實郵票表面係熨了金、銀、銅三色的，在燈光下甚有金屬質感，也算是一個賣點吧！

穿山甲喪行@烏蛟騰

一年之中最喜歡就是秋冬季節，既唔熱唔凍，又唔晒唔落雨，似乎做什麼東西都好愜意似的，連身邊的朋友也「活躍」起來，放假總是忙於去街、飲茶，當然少不了去行山這個「重點節目」。

大埔向來是基爾的首選的「後花園」，之前也曾寫過一篇由九龍坑山、沙螺洞一路走到粉嶺鶴藪水塘的網誌，一來因為喜歡大埔的行山徑比較清幽，較諸到西貢或港島區行山時的「人頭湧湧」盛況，在大埔郊區更能感受多一點大自然氣息；而且大埔的行山徑一般都較長，很多時都要花上大半天才能完成，定可盡興而歸。雖然明知如此，但這次因為貪睡而遲了起步，乘小巴來到起點烏蛟騰時已經是下午1時多。

與其他老手的「穿山甲行軍式」行山節奏不同，基爾向來行山與寫blog一樣都愛慢條斯理，行下又會停下來睇下風景影下相，以hea為第一位，絕對不是要考驗體態。然而，凡事總有例外！這次雖然是遲了起步，也明知要改一改老習慣，必須加快步伐才可趕及日落前抵達終點鹿頸，然而沿途經過九擔租，穿越一個又一個密林，在上、下苗田走過一條又一條清溪，試問又怎能忍手不停下來拍幾張「仙境照」！



好了，一行人花了3個多小時終於來到豁然開朗的三椏涌，眼前極目遠望就是有「香港小桂林」美譽的印洲塘。之前沿途都已經要大影特影一餐，來到這個「小桂林」就更忍唔到手……再看看手表時，赫然發現已是4時多，經荔枝窩到鹿頸的原定路線肯定要腰斬了。在三椏村吃點豆腐花喝點汽水後，經仔細相量，就決定沿較快的上路，繞道吊燈籠的山路，希望趕及日落前（因為沒有帶任何照明工具，也不想摸黑行山咁刺激）返回烏蛟騰，再乘小巴離開。

吊燈籠一帶的山路其實甚陡峭，加上5點過後暮色漸濃，沿途也不見人影，只有一片荒草淒淒的景象，即使有點累也不敢再hea，沿山路一直以極少用的「穿山甲」行軍式步伐快速前行，也無暇停下來眺望山下印洲塘的靚景。最後到了6點幾，在「伸手勉強可見五指」的情況下順利返抵烏蛟騰小巴站，總算體驗了一次先甜後苦的難忘行山旅程。

少爺兵修理錄影機

以往家中事無大小，很多時都會由家人一手包辦，間房、整閣仔、髹油漆、電箱燒fuse、換光管士撻，以至廁所水箱、水喉漏水之類的，悉數由基爾爸基爾哥上陣，絕不會郁D就call師傅上門修理。由於他們實在太能幹，孻仔基爾一般只會扮演翹埋雙手的少爺仔，極其量只旁當助手遞上士巴拿、螺絲批。不過，今次避無可避終要出山，立即call call曾sir上身先。

令基爾毅然出山的，就是這部老爺VHS錄錄機，說它是古董也不誇張！記憶中它是上世紀的產品，且一直老當益壯運作正常，但近年比較少用了，最近忽然身痕又想用它來play舊錄影帶，怎知竟食帶食到七彩，同時也無法再錄電視節目，於是拎去電器鋪交畀師傅整。怎知卻換來嘲笑聲，「唔係嘛！喱D古董依家無人會整架啦喎~~~整返都要幾百蚊，徒藥費啦！我地喱度有幾款機頂盒，也有預錄功能的，依家大部份人都係用喱種喱種同埋喱種……」唉~~算把啦，D老爺野依家都唔會有人珍惜架喇，一於自己動手修理啦！

這天基爾媽買?回家，見少爺基爾將部錄影機「五馬分屍」即嚇了一跳，還投以懷疑的眼光說﹕「掂唔掂架你，搞壞左部機事小，咪一陣搞到成屋跳fuse兼爆炸就得喇！」基爾﹕「車！邊會咁誇張呀……而且部機反正都壞架啦！」說著就立即展開臨床實驗，懶理基爾媽一臉無奈的樣子。



錄影機的構造其實不太複雜，鬆開了左右及後面的螺絲，就可以將整個外殼鐵蓋揭起。打開一看，立即被裏面精密的電路板嚇了一嚇，不過定D黎，如果錄影機只是出現食帶情況，一般不會是電路板出問題。重新駁上電源，再插進一盒錄影帶試一試，仔細觀察每部份機件的運作，一定要找出導致食帶的原因！

首先發現磁鼓如常轉動，排除了這方面的問題；再看看負責捲帶的兩個轉軸，竟發現當中forward的轉軸窒窒下，後來甚至停了不轉，令大量磁帶不停捲出盒外，纏繞了其他機件，原來這就是導致不斷食帶的「元兇」。



找到致命「兇手」後，就要想方設法整治它。先用螺絲批將轉軸上的固定鐵架鬆開，再鬆走轉軸上的螺絲，將它們逐步拆下來，立即發現裏面原來纏繞了一團塵，令轉軸無法正常轉動。立即用尖鉗子清走所有灰塵，再用酒精抹一抹，並在轉軸上噴一層防鏽潤滑劑WD-40。同時，要緊記剛才鬆走轉軸及固定架等步驟，將零件逐件原位重新裝上。然後再放入錄影帶，按動play、fast forward及rewind等按鈕，讓轉軸以不同轉速不同方向轉動一會，令潤滑劑發揮作用。見轉軸回復運作，磁帶也不再捲出來纏繞其他機件，算是根治了食帶問題，便可安心蓋上外殼，並插回天線和紅白黃三色線等。然後開著電視及錄影機，較好台後按play掣~~~登登登凳！掂左，終於play到啦，仲唔再食帶添！Yeah！

基爾媽聽到基爾的歡呼聲，也從廚房探出頭來，「竟然搞得掂？！大個仔啦喎真係！仲慳返幾百蚊添喎！」雖然搞到一身汗，卻可換來基爾媽的信服眼光，也是值得的，至少基爾在她眼中已經「升呢」，再不是只懂食同玩的少爺仔。

瑤池在水中央@城門水塘

天氣涼了，係時候又要出動行下山。去邊好？近近地就去城門水塘打個round。睇人地blog話城門水城係「港版九寨溝」，睇相影出黎又真係有D似架！所以這次索性帶埋相機去，希望影返D靚景相。

雖然基爾並唔係第一次行城門水塘，不過之前既懶又嫌麻煩，所以從來無帶相機同行，這次算係處子之作，影不好請莫見笑。話說回來，城門水塘確實係一處幾熱門的行山、影相、餵馬騮、釣魚同埋拍拖的聖地，這次就一次過全部見到晒。當然這裏人氣咁鼎盛，亦都係因為交通實在太方便。由荃灣千色店後面的兆和街乘82號綠色小巴，不到半粒鐘已到達城門水塘菠蘿壩的總站。選擇走的只是難度較低的菠蘿壩自然郊遊徑及水務用車路環繞城門水塘hea一圈而已。雖然早有心理準備，但當一走上郊遊徑時，仍被「美猴王兵團」嚇了一跳，還立即同場上演猴子偷桃~~~sorry！應該係偷蘋果的「true monkey show」，不要以為佢地個個肥斯大隻咁，原來身手都好敏捷架！



同迎賓的馬騮儀仗隊say goodbye後，行行下就來到著名的白千層林蔭大道。白千層係城門水塘最具代表性的樹種，英文名為Paper-bark Tree，學名為Melaleuca quinquenervia，屬常綠喬木，也是全球生長得最快的樹木，一年可長高十米，成年的白千層一般可達25米高。由於白千層適應力強，不論潮濕及乾燥的環境都能速迅生長。早於20世紀初港府陸續修建水塘時，白千層已由原生地澳門引入作植林及鞏固斜坡之用，常見於郊區、水塘邊及新界高速公路旁。白千層最明顯的特點係樹幹上一片片的樹皮，有點水松的質感，走近仔細聞一聞，還有點白花油味，聽聞它的樹葉可提煉出白樹油，是製造白花油和萬金油的成分之一。



環繞城門水塘的畔塘徑（Reservoir walk）基本上沒有任何難度，連斜路也不太多，可以好hea地走，沿途也有不少「歇腳點」，而且風景也著實不錯。記得上次來的時候水塘的水位較滿，湖邊的白千層浸在水中，波平如鏡的湖面倒影出四周的山水景緻，確實有幾分九寨溝神緒（雖然基爾未去過九寨溝），至少在香港的石屎森林內，如此級數的天然靚景並不多見。事實上，昔日確實有不少古裝片會來這裏取景，因為勝在無電線杆、輸電塔之類的東西，唔駛驚會穿崩。



除了「美猴王」之外，近年城門水塘也成為迷你黃牛牧場，正確來說甚至不能說是牧場，因為在這裏四圍漫步自由自在食草的黃牛並非由人飼養的，牠們原是這裏附近一帶農地的耕牛，不過後來農田荒廢了，黃牛就被農夫放生。由於城門水塘一帶水草豐茂，所以就吸引了不少流浪牛來棲息。這次來到水塘邊，還看到一隻小黃牛，初時牠還怕羞地挨近牠的牛媽媽，且寸步不離，後來牠見遊人沒有殺傷力，就放心地獨個兒躺在翠線的草地上晒晒太陽。



有大群黃牛同白千層作背景，當然要拍張照，出來的感覺竟然也有點瑞士feel！離開「牛牧場」繼續前行，不經不覺又來到城門水塘的主壩，行程也差不多來到尾聲，看看手表也不過走了3個多小時！在大壩上看日落原來也甚正，「鹹蛋黃」映照出的晚霞，再襯托湖面的銀光，效果都唔錯。聳立於湖中的抽水塔，驟眼睇也有D歐洲堡壘feel，算是英國人留給香港人的一點小禮物吧！



大壩的盡頭有一塊大石碑，記載了當年修築城門水塘的歷史﹕話說20世紀初香港的人口不斷上升，為解決港九新界的供水問題，港府於1923年開始計劃於大帽山東面城門八村一帶的山谷修築水塘，並從英國聘請工程顧問公司「Sir Alexander Binnie Son & Deacon」的技術人員負責策劃及設計，工程高峰期參與建設的工人達2,160名。第二期工程於1935年動工，除了增建了菠蘿壩外，還修築了九龍接收水塘及石梨貝濾水廠。到了1936年完工後，整個城門水塘工程總儲水量達30億加侖，全期耗資950多萬港元，不論以當年英國本土，甚至大不列巔帝國全球眾多屬土合計，都是最大規模的儲水庫。由於落成時正值紀念英皇佐治五世登基25年，水塘易名為銀禧水塘（Jubilee Reservoir），直至戰後才回復城門水塘舊稱。



原來，得閒行下水塘，都可以上香港歷史堂！

煎釀青椒矮瓜

早前某個星期日晚，基爾與基爾媽飯後難得排排坐睇《美女廚房》（基爾好少坐定定睇電視），突然基爾媽感嘆地說﹕「阿仔，你睇下依家D女仔係唔識煮飯架！你都係時間跟我學返兩道散手，唔係第二時實聽餓死架啦！」基爾的額角立即滴出一大滴汗！

若經常造訪「永樂大典」的blog友可能發現，這裏講食的網誌極少，因為基爾除了去旅行期間外，平時都很少出外食飯，比較鍾意「幫趁」基爾媽的愛心住家飯。其實基爾媽也很注重對仔女廚藝的培訓，只是孻仔基爾無心向學，算是最咋的一個，而且實習機會不多，兩三下手腳已被基爾媽叮走，久而久之只剩半桶水。既然基爾媽原來對基爾依然不離不棄，姑且重開「永樂廚房」啦！為免太緊張，上課前基爾先去看了《阿童木》輕鬆一下，這是齣典型的小朋友卡通，全院充滿孩子的笑聲，氣氛唔錯！基爾最喜歡是那個狗仔垃圾筒，幾搞笑，至於小飛俠阿童木著左衫之後好似唔太順眼，但整體也不錯，小飛俠fans應收貨。

睇完戲就要準備開工，「永樂廚房」第一堂係煮「豉汁煎釀青椒矮瓜」。由於基爾媽怕基爾個樣太細路兼烚下烚下咁，會畀街市阿叔大嬸扼秤或買左D唔靚又唔新鮮的青椒矮瓜，所以也有隨行。材料其實唔貴，在魚檔買了10蚊魚膠；再去菜檔買兩蚊青椒同4蚊矮瓜就返歸。



記得細個時放學後好少去躝街，通常會立即返屋企，一路聽收音機一路做功課，另一重任就係幫返工的基爾媽先煲定老火湯。大家一聽到「老火湯」三個字可能就頭痛，實則卻非常容易，大部分材料切好洗乾淨，豬肉豬展先拖拖水就沒問題了，唯一竅門係放材料入煲的時間次序而已。一般青紅蘿蔔瘦肉湯或花生眉豆雞腳湯都不難，當然基爾媽會不時打電話返黎提一提基爾落乜野材料。還記得當年為了慳煤氣費，多用火水爐煲老火湯，拎住果條小鐵枝點火水爐和控制爐芯的推杆也是一門學問。當然依家久疏戰陣，早已將成本煲湯秘笈畀返晒基爾媽！

說回煮這味「豉汁煎釀青椒矮瓜」，難度系數約3.9，主要其實唔係難而係煩，工序較多而已！買返來的魚膠一般都已經搞好及調味，如果家中有小朋友的話，可以自行加工琢幼一點，以防裏面隱藏細骨。如果嫌腥的話，也可自行再添少量胡椒粉、麻油或蔥花，但由於基爾向來不吃蔥、蒜、薑、芫茜、韭菜之類的東西，所以就不加了！搞好魚肉再來切青椒，一般可以一開四至五瓣，去芯去核即可；矮瓜則切去頂，再以間紋形式批皮，因為如果全部去皮，煮熟後會變成一pat野唔靚，留一點皮可令瓜身更挺，亦會好味D！批皮後再斜切成片即可。



切好青椒矮瓜後簡單清洗一下，就可準備釀魚肉的工夫。先釀矮瓜，竅門係先在瓜面上割幾刀，或挖一個小洞，再將魚肉塗在上面，就可以黐得緊一點，不會在煮的途中容易脫落，變成瓜還瓜魚還肉咁樣衰。至於青椒由於本身呈弧狀，基本上釀肉入去後都不易甩，釀好擺滿一碟後就準備起鑊。



為免魚肉黐底要洗鑊洗餐飽，基爾媽提議先用平底煎pan。先燒滾鑊再倒少少油，就可以放釀好的青椒同矮瓜落煎pan，注意魚肉要向鑊面，主要是將魚肉先煎成金黃即可！青椒矮瓜一面可留待回鑊時再煮熟。



煎好後可先將半熟的釀青椒同矮瓜放開，再用另一傳統不繡鋼鑊煮芡汁。先用少少油及一小篤蒜蓉豆豉醬放在中間爆香起鑊，再將煎好的釀青椒矮瓜倒返落鑊細力炒炒混和醬料；芡汁就用少少生抽麻油胡椒粉及糖鹽栗粉少許，用少少水撈埋一齊就OK，再慢慢倒入鑊中炒一炒，平均擺分佈好青椒矮瓜就蓋上鑊蓋小燜一陣，約分零鐘再開鑊，睇睇芡汁乾身一點後，這時可以試一試味，唔夠鹹的話，可以再添少量鹽或豉油，再煮一陣收乾水就上碟，大功告成。同場其實還有滾白菜湯及蒸肉餅，因為比較容易，不用太分神，可以集中精神煮釀青椒矮瓜。



製成品出來後當然要由基爾媽來擔任評判畀分，結果得7.5分，即係有佢七成半水準，算係咁啦！最主要扣分的地方係唔夠乾身，碟底似乎有太多汁，問題出在矮瓜煮熟後通常會出水，所以通常要煮乾一點先上碟，基爾實在太心急，當然也可以加上釀豆腐卜，發揮吸汁功效。

Anyway，這味「豉汁煎釀青辣矮瓜」總算不失禮吧！只是煮完一大餐又要忙影相實在太疲累，幾乎已經沒有什麼胃口，只吃了一點點。聽說做到出色廚師的先決條件係為食，所以基爾應該不何能當上「廚神」了！當然煮完一餐飯之後就更崇拜基爾媽，覺得佢真係好犀利同埋好偉大啊！

風從寶島來@台中

所謂永恒，豈非是怕鬼的夜行人，用來壯膽的一句口令
在吹熄火把的黑風裏
向前路的過客，或後路的來人
間或遠遠打一聲招呼，暗傳一個動人的傳說
說是有一座不夜城
野花綻蕊迸放的千燈，邊界一過赫然就在望
從不可逼視的中央廣場
迎面激射而來的
那路，原來是一道光

大部分香港人去台灣，多數係去台北逛逛夜市、誠品之類（上兩次去都係咁），悠悠閒閒3、4天走一轉。去年《海七》後，又多了人去南部的高雄、墾丁。這次南北兩度都無去，只揀中間部分，來個「上山下海」之旅。

閃電飛抵台北桃園機場，發現幾年來變化也不大，立即將香港人慣常的急躁按奈住，節奏校慢一半……結果耐心地花了1粒鐘moonwalk過關，再閃去搵大巴站，200元台幣往台中也不太貴（約50多港元，不過後來聽民宿老闆說他們去台北多數坐80元的廉價巴士，當然停站會較多），車程大約兩個多小時。在繁忙的台中建國路總站下車時已是4時多，附近就是古色古香的台中火車站！由於首次來台中，感覺上建築物比台北還要舊，高樓大廈也不多，正合愛懷舊的基爾胃口！

拖住行李當然不會立即去逛街，大熱天時還是先去投棧為上。預訂的巧合大飯店就在台中火車站隔離街，問了一次路就找到！飯店是典型60年代王家衛式「花樣年華風情」，要慳返D盤纏嘛！幸好房間廁所尚算企理，簡單沐浴更衣後立即出動，已是傍晚6點幾華燈初上的時份。由於旅店附近就是台中的老區（如旺角），建國路一帶有不少地道街市食檔，簡單四處探探路後，發現也有麥記之類的快餐店，卻很少見到昔日寶島成行成市的快可立同刨冰，奇哉！



由於同行友人相約了當地friend晚膳，也厚著臉皮一道跟去黐餐！地道野就留返往後幾日才試。友人的台中friend原來是位富貴又好客的老兄，還駕車來接我地！又請我地食飯又做我地的柴可夫，實在太感動，在此要再三向他說聲多謝！

食飯的地方原來距離酒店甚遠，唔怪得要駕車來載我地（感覺上約是石硤尾去到尖沙嘴的路程），聽富貴老兄講，這裏是台中較新的區，叫做南屯，吃飯的地方是一間外貌似別墅多過食肆的「八錢鍋物」。單看整座建築物的外貌已經覺得好In，同火車站那邊的「老區」似乎是兩個城市。

「八錢鍋物」顧名思義係打邊爐的，不過唔係稻香、小肥羊之類的大鍋集體邊爐，而係一人一鍋的形式。同場的原來還有同行友人在台灣的其他Game友，部分由台北來，也有遠道由高雄來，真係好佩服同行友人的交遊廣闊，當然仲有多謝佢帶契我地來寶島一落地就可刷餐勁啦！



基爾媽自細教落做人唔可以飛禽大咬，所以只揀了價錢平平地的野菜鍋物，自己其實也想食得清一點，因為跟住幾日會四圍去「掃街」食野，唔想一開頭就去咁盡！不過當一盤盤食材上桌後，發現份量原來都幾勁，向來細食的基爾結果「慢食」了兩個小時，總算環保無浪費食物，埋單連飲品300元台幣左右吧！

飯後又要勞煩富貴老兄車我地返酒店，但由於實在太飽，不打算立即上房，還是先去逛逛火車站那邊湊熱鬧，順便散下步。建國路一帶果然係台中的旺角，夜晚成街人，有野食又有得shopping，幾熱鬧！來到古老的台中火車站前，只是9時多，火車站前是一個小廣場，不少人在閒逛乘涼，也有快步閃去趕車的路人，悠閒與忙碌在夜空中融為一體。

古老的台中火車站大樓在黃昏的燈光下更添幾分滄桑味，站旁一個告示牌在訴說著它的生平﹕生於明治三十八年（1905年），原屬木結構建築；大正六年（1917年）改建為現今規模，已有近百年歷史。之前看過不少昔日尖沙嘴火車站的老照片，其實也有一點這種古老味道，只可惜現在尖沙嘴只剩孤零零的一座鐘樓。人地台中市政府就先知先覺好多，早已將火車站列為法定古蹟。

火車站內的陳設也確實保養得不錯，除了古典味甚濃的候車廳及購票大堂外，竟然還有一個小小的展覽廳，廳內展出了不少台中的老照片，展廳旁邊則是一間紀念品店，出售不少關於台灣鐵路發展歷史的紀念品，之前在《前傳》中提及的那張立體懷舊火車站post card，就是在這間紀念品店買的。



離開火車站，再走出小廣場影幾張夜色照，又走去附近同樣人山人海的中山路去逛逛書店。然而飯氣攻心眼皮加重，逛了一會見無乜收穫便迅步返酒店找周公去，結束很hea的第一個半天，反正可貯點腳骨力，準備緊接幾日要行餐飽。

去旅行一般都會早睡早起，翌日大清早8點幾起身。由於「花樣年華」酒店不提供早餐，就索性外出覓食。試了中山路的「三商巧福」，門口大大個招牌寫住招牌菜係牛肉麵，但由於基爾不吃牛，就點了一碗肉丸粥。門面是快餐店模式，人客也不多，粥底也不特別好味，所以食之前連慣常的影相步驟都忘記了。

不過忘記影粥相也不要緊，因為賣點原來唔係在碗粥度。食食下同行友人發現牆上有張海報，上面長篇大論寫住該店的悠久歷史，以及其賣點原來係佢地D碗同匙羹，矜貴就矜貴在喱D碗同匙羹全部係hand made，所以每隻個樣都唔同（老實講我真係睇唔出）。此外，海報上仲詳細講解D碗同匙羹的精心製作過程﹕採用獨家氧化鐵釉料配方，經天目燒方式，鍛燒溫度攝氏1200至1300度，持續鍛燒14至16小時，令每個瓷碗釉色皆不同，以臻完美……算把啦！反正45蚊台幣一碗粥，同海皇差不多吧！吃了不肚餓就OK。還是快快返回酒店checkout，拖住行李繞過酒店後的橫街，來到綠川東街的長途巴士站，乘搭同樣懷舊味道十足的老爺單層巴士，向下一站「日月潭」出發！

遺忘的卡式時光@葉德嫻

早前mp3失驚無神報廢了，間接又燃起昔日聽cassette帶的懷舊興致，還是舊東西襟聽一點！一盒盒cassette從櫃桶深處搬出來，確實有點似「出土文物」。先小心翼翼拭抹盒帶表面的灰塵，再仔細用火酒擦一擦唱機的磁頭，問題不大，昔日也經常做這種功夫，彷彿是聽cassette前必備的膜拜儀式，十幾年後的今天幾乎也沒有生疏……第一餅帶聽乜好呢？就這兩盒吧——騷靈女王葉德嫻的《第一葉》及《第二葉》。

兩盒帶的封面設計頗特別，一盒大大隻字寫上「Deanie」，另一盒則是「Ip」。對，連起來就是葉德嫻的英文名。不能否認香港樂壇確實「新不如舊」，80's黃金時期不論歌手類型及歌曲的題材品種都更百花齊放，至少當今樂壇就找不到一位歌手有能力（或實力）翻唱葉德嫻soul味十足的經典歌，想不懷舊都沒辦法！

說回《第一葉》和《第一葉》，翻查資料原來都是1995年出品，應是葉德嫻當年收山暫別樂壇的精選集，當中收錄的幾乎已經盡覽她在永恒及黑白唱片公司時代的好歌，比現在那些出完又出濫竽充數的精選碟要認真得多。先看《第一葉》個list，前4首已經好精彩﹕《千個太陽》、《星塵》、《倦》、《我要》，靜若處子動若脫兔，是4種不同的感覺，Deanie的演繹完全駕輕就熟收放自如。接著還有經典的二女合唱歌《兩個女人》及搞鬼之作《情人Lift》。比較喜歡的還有日本味較濃的《愛情味道》及《樹上的小詩》，還有電影感十足的《再生夢》。



由於《第一葉》中並沒有收錄《明星》、《幸運是我》等Deanie的名曲，好明顯是有「後著」。果然，數個月之後唱片公司再推出《第二葉》，與前作同樣收錄了16首歌，比較喜歡的有《你留我在此》、《變》、改編自50年代美國黑人男歌手Sam Cooke《You Send Me》的《飄》、《不捨也為愛》、《紅紅絲巾》和《兩個女人》，前兩者都屬陳永良的作品，極具水準。

不能不提的是Deanie另一首滄海遺珠《不捨也為愛》，是電視劇《鬼咁夠運》的另一首插曲，當年的電視劇除了主題曲外，很多時都有幾首插曲。顧家輝寫的曲固然很有80年代電視劇歌曲的韻味，盧國沾的詞也很有老一輩填詞人講求的意境﹕「一片山一片海，我付過厚愛；一寸草滿地蓋，往日足跡所在。但我告別它，說聲再見，有些決定屬意外……」

一直也很鍾愛Deanie那把可以演繹出不同風格歌曲的聲線，要嫵媚的有 《輕輕嘆》、《橋》；要火爆的有《一千個討厭》；要落泊滄桑的有《邊緣回望》；要sweet的又有《心比蜜甜》。現在聽新碟，好多時聽半隻已覺好鬼悶，好想stop；但若聽《第一葉》同《第二葉》，你就會領略到乜野叫做「百聽不厭」！